QazNews24 ساتيرالىق پاراقشاسىنىڭ اكىمشىسى تەمىرلان ەڭسەبەككە قاتىستى سوت وتىرىسى ءوتتى، دەپ حابارلايدى “ادىرنا” ۇلتتىق پورتالى Orda.kz-كە سىلتەپ.
27 اقپان كۇنى الماتى قالاسىنىڭ المالى اۋداندىق سوتىندا QazNews24 ساتيرالىق پاراقشاسىنىڭ اكىمشىسى تەمىرلان ەڭسەبەككە قاتىستى العاشقى سوت وتىرىسى ءوتتى. ول سوتقا ونلاين رەجيمدە قاتىستى.
سوت پروتسەسى باستالار الدىندا كۇتپەگەن وزگەرىستەر ورىن الدى – سۋديا اۋىسىپ، ءىستى سەرىك كەنىشەۆ قارايتىن بولدى. بۇعان دەيىنگى سوت وتىرىسى «سۋديانىڭ وتباسىلىق جاعدايىنا» بايلانىستى كەيىنگە شەگەرىلگەن ەدى.
وتىرىستا پروكۋرور ايناش جۋاسباەۆا ءىستى ناۋرىزباي اۋداندىق سوتىنا اۋىستىرۋدى سۇرادى. سەبەبى ەڭسەبەك ءدال وسى اۋداندا ۇستالعان. ادۆوكات جانار بالعاباەۆا بۇل ماسەلەنىڭ تەرگەۋ كەزىندە كوتەرىلمەگەنىن ايتىپ، تەمىرلاننىڭ سوتقا وففلاين قاتىسۋىن سۇرادى. سۋديا بۇل ءوتىنىشتى قاناعاتتاندىردى.
سونداي-اق، ادۆوكات بالعاباەۆا سوتتىڭ اشىق ءوتۋىن جانە حالىقارالىق باقىلاۋشىلاردىڭ قاتىسۋىن تالاپ ەتتى. ال ەڭسەبەك:
«ايىپتاۋ اكتىسىندە مەنى ادامزاتقا قارسى قىلمىس جاسادى دەپ كورسەتسە، وندا ادامزات وسى سوتتى كورەتىن بولسىن. ونىڭ ۇستىنە، سوت قىزىقتى وتەدى»، – دەپ مالىمدەدى.
ادۆوكات سوت وتىرىسى كەزىندە تەمىرلاندى بوستاندىققا شىعارۋدى جانە بۇلتارتپاۋ شاراسىن ءۇي قاماققا اۋىستىرۋدى سۇرادى. الايدا پروكۋرور ونىڭ قىلمىسىن «اۋىر» دەپ باعالاپ، ءوتىنىشتى قاناعاتتاندىرماۋدى سۇرادى. ناتيجەسىندە، بارلىق وتىنىشتەر قابىلدانباي، ءىس ناۋرىزباي اۋداندىق سوتىنا اۋىستىرىلدى. تەمىرلان ەڭسەبەك قاماۋدا قالا بەرەدى.
ەسكە سالساق، تەمىرلان ەڭسەبەككە قر قىلمىستىق كودەكسىنىڭ 174-بابى («ۇلت ارالىق ارازدىقتى قوزدىرۋ») بويىنشا ءىس قوزعالعان. ونىڭ تينا كاندەلاكي تۋرالى جازباسى مەن «يوۋ، ورىستار» ءانىنىڭ جاريالانۋى تەرگەۋگە نەگىز بولدى.
