ساتيرالىق Qaznews24 پاراقشاسى جۇمىسىن توقتاتتى. بۇل تۋرالى اگەنتتىك جەلىدەگى رەسمي پاراقشاسىندا ايتتى، دەپ حابارلايدى «ادىرنا» ءتىلشىسى.
«قۇقىق قورعاۋ ورگاندارى تاراپىنان رەداكتسيا مۇشەلەرىنىڭ تۋىستارىنا قىسىم جاسالىپ، جاڭا تەرگەپ-تەكسەرۋلەر باستالۋىنا بايلانىستى ءبىز اگەنتتىگىمىزدى جابۋ تۋرالى شەشىم قابىلدادىق. قازىرگى جاعدايدا جۇمىسىمىزدى جالعاستىرا المايمىز، سول ارقىلى كونستيتۋتسيامىزدا كەپىلدىك بەرىلگەن ءسوز بوستاندىعى مەن شىعارماشىلىق ەركىندىگىمىزدى جۇزەگە اسىرۋ مۇمكىندىگىنەن ايىرىلىپ وتىرمىز»،—دەلىنگەن حابارلامادا.
اگەنتتىك بارشا وقىرمانىنا العىسىن ايتتى.
«گرانتتار تۋرالى ەشبىر ەرتەگىگە سەنبەڭىزدەر، Qaznews24 جارناما بەرۋشىلەر مەن جازىلۋشىلاردان تۇسكەن دوناتتاردان باسقا ەشكىمنەن ءبىر تيىن دا العان ەمەس. ءبىزدىڭ ماقساتىمىز ساياسي ساتيرانىڭ ەلىمىزدە ءومىر سۇرۋگە قۇقىعى بار ەكەنىن كورسەتۋ ەدى. بىراق، وكىنىشكە قاراي، بۇل «جاڭا قازاقستاندا» مۇمكىن بولماي شىقتى. بارلىق جازىلۋشىمىزعا قولداۋلارى ءۇشىن العىس ايتامىز. ءبىز سىزدەر ءۇشىن جۇمىس ىستەدىك»،—دەپ تولىقتىردى پاراقشا اكىمشىلەرى.
ەسكە سالايىق، ساۋىردە ساتيرالىق پابليكتىڭ اۆتورى تەمىرلان ەڭسەبەك شارتتى تۇردە 5 جىلعا سوتتالعان ەدى. ول قك 174 (ۇلتارالىق ارازدىقتى قوزدىرۋ) بابىنا سايكەس كىنالى دەپ تانىلعان.
