اقتاۋعا جاقىن جەردە قۇلاعان ۇشاقتا بولعان جولاۋشىسى نۋرۋللاح سيرادجوۆ اۋە اپاتى تۋرالى ايتىپ بەردى، دەپ حابارلايدى "ادىرنا" ۇلتتىق پورتالى Oxu.Az-قا سىلتەمە جاساپ.
ول - اپات كەزىندە امان قالعانداردىڭ ءبىرى.
"مەن ايەلىممەن بىرگە گروزنىيدا تۇراتىن ۇلىما بارا جاتقان ەدىم. ۇشاق العاش رەت سوققىعا ۇشىراعاندا، اياق استىمدا وتتىڭ جالىنداعانىن سەزدىم دە، جاراقات الدىم دەپ ويلادىم. ايەلىمدى سابىرعا شاقىرۋعا تىرىستىم. بىراق وزىمدە ۇرەي باسىم بولدى. بەلدىكتى شەشىپ، اياق استىنا قاراعانىمدا ۇشاقتىڭ ەدەنى ءبۇتىن ەدى. مەن قايتادان ورنىما وتىردىم. سول كەزدە ۇشاقتىڭ ارتقى بولىگىنە الدەقايدا قاتتى سوققى ءتيدى. ستيۋاردەسسالار جولاۋشىلاردى سابىرعا شاقىرىپ، گروزنىيعا قونامىز دەپ حابارلادى", – دەيدى سيرادجوۆ.
جولاۋشىنىڭ ايتۋىنشا وسى كەزدە ۇشاق تومەندەپ كەلە جاتقان.
"مەن ءبىز قونۋعا جاقىنداعانىمىزدى، اۋەجاي عيماراتىن، جولاقتاردى، ۇشاقتاردى كوردىم. ون قاباتتى عيماراتتان تومەنگە قاراعانداي ەلەستەتىڭىز. ءبىز جەرگە وتە جاقىن بولدىق. قوناتىنىمىزعا سەنىمدى ەدىك", – دەيدى ول.
بىراق ءدال سول ساتتە ۇشاق قايتادان جىلدامدىق الىپ، كوككە كوتەرىلگەن.
"ستيۋاردەسسا جۇمساق زاتتاردى جيناپ، باسىمىزدى الدىڭعى ورىندىققا تىرەپ، كوزىمىزدى جابۋدى ۇسىندى. مەنىڭ قالىڭ كۇرتەشەم بار ەدى، ونى ايەلىمە بەرىپ، ورىننان قوزعالماۋىن ءوتىندىم، نۇسقاۋلىق بويىنشا ارەكەت ەتۋدى ايتتىم. قورقۋ تۋرالى ويلاعان دا جوقپىن، تەك ايەلىمنىڭ اماندىعى ءۇشىن الاڭدادىم. سول كەزدە ۇشاقتىڭ جەرگە قۇلاعانىن سەزدىم", – دەپ قوستى سيرادجوۆ.
2024 جىلعى 25 جەلتوقساندا اقتاۋ اۋەجايىنان ءۇش شاقىرىم جەردە Azerbaijan Airlines (AZAL) ازەربايجان اۋە كومپانياسىنىڭ Embraer ۇشاعى اپاتقا ۇشىرادى. ۇشاق بورتىندا 62 جولاۋشى جانە 5 ەكيپاج مۇشەسى بولعان. اپاتتان 29 ادام امان قالدى – ولاردىڭ اراسىندا ازەربايجان، رەسەي جانە قىرعىزستان ازاماتتارى بار. قازاقستاندىقتار اراسىندا ءتىرى قالعاندار جوق.
ەسكە سالا كەتەيىك، اپاتقا ۇشىراعان Embraer ۇشاعىنىڭ قارا جاشىكتەرىنىڭ دەرەكتەرى تالدانىپ، قازاقستانعا جىبەرىلگەن بولاتىن.
