Aqtaýǵa jaqyn jerde qulaǵan ushaqta bolǵan jolaýshysy Nýrýllah Sıradjov áýe apaty týraly aıtyp berdi, dep habarlaıdy "Adyrna" ulttyq portaly Oxu.Az-qa silteme jasap.
Ol - apat kezinde aman qalǵandardyń biri.
"Men áıelimmen birge Groznyıda turatyn ulyma bara jatqan edim. Ushaq alǵash ret soqqyǵa ushyraǵanda, aıaq astymda ottyń jalyndaǵanyn sezdim de, jaraqat aldym dep oıladym. Áıelimdi sabyrǵa shaqyrýǵa tyrystym. Biraq ózimde úreı basym boldy. Beldikti sheship, aıaq astyna qaraǵanymda ushaqtyń edeni bútin edi. Men qaıtadan ornyma otyrdym. Sol kezde ushaqtyń artqy bóligine áldeqaıda qatty soqqy tıdi. Stıýardessalar jolaýshylardy sabyrǵa shaqyryp, Groznyıǵa qonamyz dep habarlady", – deıdi Sıradjov.
Jolaýshynyń aıtýynsha osy kezde ushaq tómendep kele jatqan.
"Men biz qonýǵa jaqyndaǵanymyzdy, áýejaı ǵımaratyn, jolaqtardy, ushaqtardy kórdim. On qabatty ǵımarattan tómenge qaraǵandaı elestetińiz. Biz jerge óte jaqyn boldyq. Qonatynymyzǵa senimdi edik", – deıdi ol.
Biraq dál sol sátte ushaq qaıtadan jyldamdyq alyp, kókke kóterilgen.
"Stıýardessa jumsaq zattardy jınap, basymyzdy aldyńǵy oryndyqqa tirep, kózimizdi jabýdy usyndy. Meniń qalyń kúrteshem bar edi, ony áıelime berip, orynnan qozǵalmaýyn ótindim, nusqaýlyq boıynsha áreket etýdi aıttym. Qorqý týraly oılaǵan da joqpyn, tek áıelimniń amandyǵy úshin alańdadym. Sol kezde ushaqtyń jerge qulaǵanyn sezdim", – dep qosty Sıradjov.
2024 jylǵy 25 jeltoqsanda Aqtaý áýejaıynan úsh shaqyrym jerde Azerbaijan Airlines (AZAL) ázerbaıjan áýe kompanııasynyń Embraer ushaǵy apatqa ushyrady. Ushaq bortynda 62 jolaýshy jáne 5 ekıpaj múshesi bolǵan. Apattan 29 adam aman qaldy – olardyń arasynda Ázerbaıjan, Reseı jáne Qyrǵyzstan azamattary bar. Qazaqstandyqtar arasynda tiri qalǵandar joq.
Eske sala keteıik, apatqa ushyraǵan Embraer ushaǵynyń qara jáshikteriniń derekteri taldanyp, Qazaqstanǵa jiberilgen bolatyn.
