ۇلتتىق قوعامدىق دەنساۋلىق ساقتاۋ ورتالىعىنىڭ باسشىسى ايجان ەسماعامبەتوۆا قازاقستاندا مەتاپنەۆموۆيرۋس تارالۋىنا بايلانىستى كارانتين ەنگىزۋ جوسپاردا جوق ەكەنىن ايتتى، دەپ حابارلايدى "ادىرنا" ۇلتتىق پورتالى.
ايجان ەسماعامبەتوۆانىڭ ايتۋىنشا، قازىرگى ۋاقىتتا ەلىمىزدەگى ەپيدەميولوگيالىق جاعداي تۇراقتى.
ء"بىز ەپيدەميولوگيالىق ماۋسىمنىڭ ورتاسىندامىز. وتكەن جىلمەن سالىستىرعاندا اۋرۋشاڭدىق 20 پايىزعا تومەن. الايدا قاڭتار ايىندا ادەتتە اۋرۋدىڭ ءوسۋى بايقالىپ، اقپان ايىنىڭ ورتاسىنا قاراي تومەندەيدى. قازىر كارانتيندىك نەمەسە شەكتەۋ شارالارىن ەنگىزۋگە ەش نەگىز جوق. ءبىز اۋرۋشاڭدىق پەن ۆيرۋستىڭ تارالۋىن كۇن سايىن دەرلىك قاداعالاپ وتىرمىز", – دەدى ول Facebook پاراقشاسىندا جاريالاعان ۆيدەودا.
ەسماعامبەتوۆانىڭ ايتۋىنشا، دەنساۋلىعى مىقتى جانە يممۋنيتەتى جاقسى ادامداردا ۆيرۋس سيمپتومسىز ءوتۋى مۇمكىن.
"ۆيرۋستىق ينفەكتسيالارمەن، تۇماۋمەن نەمەسە تۇماۋعا ۇقساس ينفەكتسيالارمەن اۋىرعان كەزدە ولاردىڭ اسقىنۋلارى قاۋىپتىرەك. مەتاپنەۆموۆيرۋس پنەۆمونيا، وتيت جانە تىنىس الۋ ورگاندارىنا قاتىستى جانە باسقا دا كەز كەلگەن اسقىنۋلار تۋدىرۋى مۇمكىن", – دەپ اتاپ ءوتتى ەسماعامبەتوۆا.
سونىمەن قاتار، ەسماعامبەتوۆا قازاقستاندىقتارعا ادامدار كوپ جينالاتىن ورىنداردان اۋلاق بولۋدى، ماسكا تاعۋدى جانە بولمەلەردى ءجيى جەلدەتۋدى ۇسىندى.
ەسكە سالا كەتەيىك، جەكسەنبى كۇنى قىتايدا مەتاپنەۆموۆيرۋس (hMPV) دەپ اتالاتىن جاڭا ۆيرۋستىق اۋرۋدىڭ ءورشۋى تىركەلگەن ەدى. ۆيرۋس تەز تارالۋىپ، سالدارىنان اۋرۋحانالار ناۋقاستارعا لىق تولعان.
