قازاقستاندا جاڭا يپوتەكالىق باعدارلامالار پايدا بولادى. بۇل تۋرالى ۇكىمەت وتىرىسىندا پرەمەر-مينيستر ولجاس بەكتەنوۆ مالىمدەدى، دەپ حابارلايدى "ادىرنا" ۇلتتىق پورتالى.
"ونەركاسىپ، ەنەرگەتيكا، كولىك، اۋىل شارۋاشىلىعى، سۋ رەسۋرستارى مينيسترلىكتەرىنە كاسىپورىندارمەن، اكىمدىكتەرمەن جانە وتباسى بانكىمەن بىرلەسىپ، جۇمىسشى كادرلار ءۇشىن يپوتەكالىق جانە جالعا بەرىلەتىن تۇرعىن ءۇيدىڭ جەڭىلدەتىلگەن باعدارلامالارىن ىسكە قوسۋ ماسەلەلەرىن پىسىقتاۋدى تاپسىرامىن", – دەدى پرەمەر-مينيستر.
سونداي-اق، ولجاس بەكتەنوۆ قازاقستانعا مىڭداعان بىلىكتى جۇمىسشىلار قاجەت ەكەنىن اتاپ ءوتتى.
"جىل سايىن جاڭا ماماندىقتار پايدا بولىپ جاتىر. سوندىقتان بولاشاقتاعى داعدىلار مەن قۇزىرەتتەردى بولجاۋ ءۇشىن بارلىق اكىمدىكتەرگە وڭىرلىك كاسىپتەر اتلاسىن ازىرلەۋ قاجەت. ازىرگە مۇنداي قۇجات تەك 9 وڭىردە عانا بار. جاستاردىڭ جۇمىسشى ماماندىقتاردى سانالى تۇردە تاڭداۋىنا جاعداي جاساۋ ءۇشىن كاسىبي باعدار بەرۋ جۇمىسىندا جاڭا تاسىلدەردى جۇزەگە اسىرۋ قاجەت", – دەپ اتاپ ءوتتى پرەمەر-مينيستر.
