Qazaqstanda jańa ıpotekalyq baǵdarlamalar paıda bolady. Bul týraly Úkimet otyrysynda Premer-mınıstr Oljas Bektenov málimdedi, dep habarlaıdy "Adyrna" ulttyq portaly.
"Ónerkásip, energetıka, kólik, aýyl sharýashylyǵy, sý resýrstary mınıstrlikterine kásiporyndarmen, ákimdiktermen jáne Otbasy bankimen birlesip, jumysshy kadrlar úshin ıpotekalyq jáne jalǵa beriletin turǵyn úıdiń jeńildetilgen baǵdarlamalaryn iske qosý máselelerin pysyqtaýdy tapsyramyn", – dedi Premer-mınıstr.
Sondaı-aq, Oljas Bektenov Qazaqstanǵa myńdaǵan bilikti jumysshylar qajet ekenin atap ótti.
"Jyl saıyn jańa mamandyqtar paıda bolyp jatyr. Sondyqtan bolashaqtaǵy daǵdylar men quzyretterdi boljaý úshin barlyq ákimdikterge óńirlik kásipter atlasyn ázirleý qajet. Ázirge mundaı qujat tek 9 óńirde ǵana bar. Jastardyń jumysshy mamandyqtardy sanaly túrde tańdaýyna jaǵdaı jasaý úshin kásibı baǵdar berý jumysynda jańa tásilderdi júzege asyrý qajet", – dep atap ótti Premer-mınıstr.
