19 شىلدەدە «وتباسى» بانكى «ۇماي» ايەلدەر يپوتەكاسىنا ءوتىنىش قابىلداۋدى جالعاستىرادى. بۇل باعدارلامانى پايدالانىپ، استانا، الماتى، اقتاۋ جانە اتىراۋدان باسقا قازاقستاننىڭ كەز كەلگەن قالاسىندا باسپانا ساتىپ الۋعا بولادى. بۇل قالالاردا پاتەر ساتىپ الۋ ءليميتى تاۋسىلعان، سوندىقتان «ۇماي» باعدارلاماسىنا قاتىسۋشىلار بۇل جەردەن شارشى مەتردى ساتىپ الا المايدى، دەپ حابارلايدى "ادىرنا" پورتالى.
«ۇماي» تۇرعىن ءۇيدى نەسيەلەندىرۋ باعدارلاماسى قازاقستاندا ءۇشىنشى جىل جۇمىس ىستەيدى. بۇل «وتباسى» بانكى مەن ازيا دامۋ بانكىنىڭ (ادب) بىرلەسكەن جوباسى. بيىل ءۇشىنشى ترانش اياسىندا ونى جۇزەگە اسىرۋعا 15,6 ملرد تەڭگە ءبولىندى. وتىنىمدەردى قابىلداۋ 2023 جىلدىڭ 10 مامىرىندا باستالا سالىپ، سول كۇنى تۇستەن كەيىن بولىنگەن اقشانىڭ ءليميتى تاۋسىلدى.
جالپى، بۇل كۇنى بانك 15,6 ملرد تەڭگە سوماعا 1000-عا جۋىق ءوتىنىشتى قابىلدادى.
«باعدارلاماعا قاتىسۋعا ءوتىنىش بەرگەن كەزدە كليەنت تۇرعىن ءۇيدى ساتىپ الۋدىڭ بولجامدى سوماسىنا نەسيەگە الدىن الا ماقۇلداۋ سەرتيفيكاتىن الادى. بۇل سوما بىردەن كليەنت ءۇشىن ساقتالادى. بۇل سەرتيفيكات ءبىر ايعا جارامدى. وسى ۋاقىت ىشىندە كليەنت باسپانا تاۋىپ، ونى باعالاپ، تولەم قابىلەتتىلىگىن راستاپ، نەسيە الۋعا ءوتىنىش بەرۋى كەرەك»، - دەپ ءتۇسىندىردى «وتباسى بانكى».
بىراق بارلىق كليەنتتەر سەرتيفيكاتتارىن ۋاقىتىندا پايدالانبادى. ءبىر ايدان كەيىن كوبىندە «كۇيىپ كەتتى». كەيبىر كليەنتتەر پاتەردى ساتىپ الۋدى كەيىنگە قالدىرۋدى شەشىپ، ءوز ويىن وزگەرتكەن نەمەسە لايىقتى پاتەر تاپپاعان بولۋى مۇمكىن. بۇل رەتتە بىرەۋلەر ءۇشىن ءبىر اي بويى جارامدى بولعان قاراجات قۇردىمعا كەتسە، ال قالعاندارى ونى پايدالانىپ، ءوز باسپاناسىن ساتىپ الىپ ۇلگەردى.
ماسەلەن، بيىلعى جىلى بەرىلگەن وتىنىشتەردىڭ ىشىندە 400-گە جۋىق كليەنت سەرتيفيكاتتى ۋاقىتىندا پايدالانباعان نەمەسە وتىنىشتەرىن مۇلدە جويعان.
دەسە دە، سول ۋاقىتتا «ۇماي» باعدارلاماسىنىڭ 570 قاتىسۋشىسى لايىقتى باسپانا تاۋىپ، نەسيە بەرىپ، قونىس تويىن تويلاپ ۇلگەردى. تاعى 32 ءوتىنىم قاراستىرىلۋدا. بۇل ولارعا جاقىن ارادا نەسيە بەرىلىپ، جاڭا باسپانا يەلەرىنىڭ قاتارى كوبەيەدى دەگەن ءسوز.
«ايەلدەردى باسپانامەن قامتاماسىز ەتۋ باعدارلاماسى بويىنشا كەيبىر كليەنتتەر نەسيەنى پايدالانباعاندىقتان، بانكتە ءۇشىنشى ترانشتان «بوس» 8 ملرد تەڭگە قالعان. سوندىقتان بايلانىس ورتالىعىنىڭ وپەراتورلارى بانك سايتىندا بۇرىن «ۇماي» باعدارلاماسىنا قاتىسۋعا ءوتىنىم قالدىرعان، بىراق قاتىسۋشىلار پۋلىنا كىرۋگە ۇلگەرمەگەن كليەنتتەرگە تەلەفون سوققان. ناتيجەسىندە جالپى نەسيە سوماسى 2 ملرد تەڭگەگە تاعى 188 ادام تاڭدالدى»، - دەپ ءتۇسىندىردى وتباسى بانكى.
«وتباسى بانك» مەنەدجەرلەرى قوڭىراۋ شالعان باقىتتى جانداردىڭ ءبىرى – قاراعاندى قالاسىنىڭ تۇرعىنى ىڭكار الماعامبەتوۆا. ول مۇعالىم بولىپ جۇمىس ىستەيدى، كۇيەۋىمەن بىرگە ەكى بالا تاربيەلەپ وتىر. «ۇماي» باعدارلاماسى بويىنشا اتالعان وتباسى ءۇش بولمەلى پاتەر ساتىپ الدى. تۇرعىن ءۇي مەكتەپكە جاقىن ورنالاسقان، بۇل بالالارعا وتە ىڭعايلى.
«ءبىز 10 مامىردا «ۇماي» باعدارلاماسىنا قاتىسۋعا ءوتىنىم بەردىك، بىراق بىزگە بارلىق قاراجات جۇمسالىپ كەتكەنىن حابارلادى. كەيىننەن بىزگە بانكتەن قوڭىراۋ شالىپ، باعدارلاماعا قاتىسا الاتىنىمىزدى حابارلادى. باسىندا ءبىز سەنبەدىك، ويتكەنى قازىر الاياقتار كوپ. ال مەن «وتباسى بانكىنە» ءوزىم تەلەفون سوققاندا، بۇل اقپارات راستالدى، ارينە، قۋانىشىمىزدا شەك بولمادى»، - دەپ ءبولىستى ىڭكار الماعامبەتوۆا.
ايەل ادام بانكتەن نەسيە بويىنشا ماقۇلدامانى تەز العانىن، سودان كەيىن ولار دا تەز ارادا لايىقتى پاتەر تاپقانىن ايتتى.
«باعدارلاما ماعان قاتتى ۇنادى، ويتكەنى باستاپقى جارنا ونشا ۇلكەن ەمەس. سونىمەن قاتار، باسقا بانكتەرمەن سالىستىرعاندا جىلدىق مولشەرلەمە قولايلى»، - دەپ قوستى ول.
ەندى «ۇماي» باعدارلاماسىنا قوسىمشا 400-450 قازاقستاندىق قىز-كەلىنشەكتەر تاعى دا قاتىسۋعا مۇمكىندىك الادى. 2023 جىلدىڭ 13 مامىرىنداعى جاعداي بويىنشا بولىنگەن ءۇشىنشى ترانش اياسىندا بانكتە تاعى 6 ملرد تەڭگە قالدى. سوندىقتان ايەلدەر باعدارلاماسىنا قاتىسۋعا وتىنىشتەردى قابىلداۋدى 2023 جىلدىڭ 19 شىلدەسىندە ساعات 9:00-دە قايتا باستاۋ تۋرالى شەشىم قابىلداندى.
"قازاقستاندىق ايەلدەردىڭ ويلانىپ، مۇمكىندىكتەرىن سارالاپ، شەشىم قابىلداۋعا ۋاقىتى بار. "وتباسى بانكىنىڭ" كەز كەلگەن بولىمشەسىنە جۇگىنىپ، نەسيەگە الدىن الا كەلىسىمدى بىردەن الۋعا بولادى. استانا، الماتى، اقتاۋ جانە اتىراۋ قالالارىن قوسپاعاندا، ەلدەگى كەز كەلگەن قالادان باسپانا ساتىپ الۋعا بولاتىنىن ءبىلۋ ماڭىزدى. بۇل قالالاردا تۇرعىن ءۇي ساتىپ الۋعا ليميت تاۋسىلعان، - دەپ ەسكە سالدى «وتباسى» بانكى.
ازيا دامۋ بانكىنىڭ شارتتارى بويىنشا استانا، الماتى، اقتاۋ جانە اتىراۋ قالالارىندا تۇرعىن ءۇي ساتىپ الۋعا بەرىلگەن نەسيەلەردىڭ جالپى سانىنىڭ 40 پايىزىنان اسپايتىن ليميت بەلگىلەندى. ال بۇگىندە بۇل قالالاردا جىلجىمايتىن مۇلىك ساتىپ الۋعا قاجەتتى نەسيەلەر سانى بەرىلگەن.
نەسيەنىڭ قالعان 60 پايىزى وبلىس ورتالىقتارى مەن شاعىن قالالاردان شارشى مەتر ساتىپ الۋعا بەرىلۋى كەرەك. بۇل وڭىرلەردە تۇراتىن ايەل ادامداردى قولداۋ جانە نەسيەلەۋدە ديسپروپورتسيانى بولدىرماۋ ماقساتىندا جاسالدى.
«ۇماي» باعدارلاماسى بويىنشا ساتىپ الىناتىن باسپانانىڭ شەكتى قۇنى 30 ميلليون تەڭگەدەن اسپاۋى ءتيىس. وسى جىلى پايىزدىق مولشەرلەمە 14,4%-دى (جتسم 15,4%-دان) قۇرادى، كەيىننەن 3,5%-5%-عا دەيىن تومەندەدى (جتسم 3,6%-دان).
يپوتەكالىق نەسيەنىڭ مەرزىمى 6 ايدان 25 جىلعا دەيىن. بۇل رەتتە باسپانا تاڭداۋدا ەشقانداي شەكتەۋلەر جوق. نەسيەلەر قايتالاما نارىقتان تۇرعىن ءۇي ساتىپ الۋعا دا بەرىلەدى، سونىڭ ىشىندە ۇلەستىك قاتىسۋ شارتى بويىنشا دا الۋعا بولادى. سونداي-اق، باعدارلاما بويىنشا پاتەردى جوندەۋ جۇمىستارى ءۇشىن 3,7 ملن تەڭگەگە دەيىن نەسيە الا الاسىز.
«الەۋەتتى قارىز الۋشىنىڭ وتباسىنىڭ ايلىق تابىسى 550 مىڭ تەڭگەدەن اسپايتىن بولسا، وندا ول «ۇماي» باعدارلاماسى بويىنشا 15 پايىزدىق باستاپقى جارنانى تولەۋ ارقىلى نەسيە الا الادى. كىرىس 550 مىڭ تەڭگەدەن 640 مىڭ تەڭگەگە دەيىن بولسا، باسپانا قۇنىنىڭ 20 پايىزىن تولەپ نەسيە الۋعا بولادى»، - دەپ «وتباسى بانكى» باعدارلامانىڭ شارتتارىن ەسكە سالدى.
ىنتىماقتاستىق بارىسىندا ادب گەندەرلىك جوباعا 38 ملرد تەڭگە ءبولدى. ايەلدەر باعدارلاماسى ىسكە قوسىلعان 2021 جىلى، ءبىرىنشى ترانش اياسىندا 954 قازاقستاندىق ايەل جالپى كولەمى 8,4 ميلليارد تەڭگە نەسيە الا الدى. 2022 جىلى 14 ملرد تەڭگە ءبولىنىپ، وتباسى بانكىنىڭ تاعى 1 119 نازىك جاندى كليەنتتەرى تۇرعىن ءۇي ساتىپ الىپ، قونىس تويىن تويلادى.
"ادىرنا" ۇلتتىق پورتالى
