مالايزيادا وقىپ جۇرگەن 17 جاستاعى قازاقستاندىق ستۋدەنت نۇراي قادىر پنەۆمونيادان كوز جۇمدى، دەپ حابارلايدى “ادىرنا” ۇلتتىق پورتالى POLITICO.KZ-كە سىلتەپ.
نۇراي قادىر قىتايدىڭ Xiamen ۋنيۆەرسيتەتىنىڭ سەپانگ قالاسىنداعى كامپۋسىندا ءبىلىم العان. ونىڭ ولىمىنە بايلانىستى الەۋمەتتىك جەلىلەردە بىرنەشە ستۋدەنت پەن بلوگەرلەر بەينەمالىمدەمەلەر جاساپ، ۋنيۆەرسيتەت اكىمشىلىگىن ستۋدەنتتەرگە سالعىرتتىق تانىتتى دەپ ايىپتاۋدا.
“نۇراي بىرنەشە كۇن بويى جوعارى تەمپەراتۋرامەن جۇرگەن. ول بىرنەشە رەت كۋراتورلار مەن ۋنيۆەرسيتەت اكىمشىلىگىنەن مەديتسينالىق كومەك سۇراعان. الايدا ەشقانداي شارا قولدانىلماعان. تەمپەراتۋراسى 39,5 گرادۋسقا جەتكەنىمەن، وعان نازار اۋدارمادى. جاعدايى تىم ناشارلاعان كەزدە عانا كلينيكاعا جەتكىزىلگەنىمەن، بۇل كەش بولدى،” – دەيدى نۇرايمەن بىرگە وقىعان ستۋدەنتتەردىڭ ءبىرى.
قازىرگى تاڭدا الەۋمەتتىك جەلى قولدانۋشىلارى نۇرايدىڭ ولىمىنە كىنالىلەردى انىقتاپ، ءتيىستى شارا قولدانۋدى تالاپ ەتۋدە.
قازاقستاندىق قوعام بەلسەندىلەرى مەن ستۋدەنتتەر Xiamen ۋنيۆەرسيتەتىنەن رەسمي تۇسىنىكتەمە كۇتۋدە. ال قازاقستاندىق ەلشىلىك بۇل جاعدايدى باقىلاۋعا العانىن حابارلادى.
