25 جەلتوقسان كۇنى اقتاۋ قالاسى ماڭىندا ورىن العان اۋە اپاتى كەزىندە بورتسەرىك حوكۋما اليەۆا ۇشاقتاعى جولاۋشىلاردى سابىرعا شاقىرىپ، باتىلدىق تانىتقان. بىلىكتى بورتسەرىك قازا تاپتى، دەپ حابارلايدى "ادىرنا" ۇلتتىق پورتالى apa.az باسىلىمىنا سىلتەمە جاساپ.
33 جاستاعى حوكۋما اليەۆا – Azerbaijan Airlines (AZAL) اۋەكومپانياسىنىڭ قىزمەتكەرى. ول وسى سالادا 9 جىلدىق تاجىريبەسى بار بىلىكتى بورتسەرىك بولعان.
"حوكۋما ۇشاق قۇلاپ بارا جاتقاندا جولاۋشىلارعا ء"بارى جاقسى بولادى" دەپ، ولاردى تىنىشتاندىرىپ، سابىرعا شاقىرعان،" – دەپ جازدى باسىلىم.
حوكۋما 6 جاسىنا دەيىن رەسەيدە ءبىلىم الىپ، كەيىن ازەربايجانعا ورالىپ، زاڭگەر ماماندىعىن تامامداعان. اكەسىنىڭ ايتۋىنشا، قىزى ءاردايىم مەيىرىمدى ءارى ماقساتىنا جەتۋگە ۇمتىلعان جان بولعان.
"ول ءار ساپاردان قايتىپ كەلگەندە، ءبىزدى ماقتان تۇتقانىڭىزدى قالايمىن دەپ ايتاتىن. ءبىر كۇنى قايتىپ كەلىپ، ۇشاقتارى قۇلاي جازداعانىن ايتقان ەدى... بىراق بۇل جولى مەنىڭ قىزىم ورالمادى،" – دەيدى مارقۇمنىڭ اكەسى.
ايتا كەتەيىك، اقتاۋدا قۇلاعان ۇشاقتا بارلىعى 67 ادام، ونىڭ ىشىندە 5 ەكيپاج مۇشەسى بولعان. قازا تاپقاندار سانى – 38 ادام. 29 ادام جاراقات الىپ، اۋرۋحاناعا جەتكىزىلدى، ولاردىڭ ىشىندە ەكى بالا بار. جولاۋشىلاردىڭ اراسىندا 6 قازاقستان، 42 ازەربايجان، 3 قىرعىزستان جانە 16 رەسەي ازاماتى بولعان.
قازا بولعان قازاقستاندىقتاردىڭ اتى-جوندەرى رەسمي تۇردە جاريالاندى.
اپاتتىڭ سەبەپتەرىن انىقتاۋ ماقساتىندا ۇكىمەتتىك كوميسسيا قۇرىلىپ، قىلمىستىق ءىس قوزعالدى.
