25 jeltoqsan kúni Aqtaý qalasy mańynda oryn alǵan áýe apaty kezinde bortserik Hokýma Álıeva ushaqtaǵy jolaýshylardy sabyrǵa shaqyryp, batyldyq tanytqan. Bilikti bortserik qaza tapty, dep habarlaıdy "Adyrna" ulttyq portaly apa.az basylymyna silteme jasap.
33 jastaǵy Hokýma Álıeva – Azerbaijan Airlines (AZAL) áýekompanııasynyń qyzmetkeri. Ol osy salada 9 jyldyq tájirıbesi bar bilikti bortserik bolǵan.
"Hokýma ushaq qulap bara jatqanda jolaýshylarǵa "bári jaqsy bolady" dep, olardy tynyshtandyryp, sabyrǵa shaqyrǵan," – dep jazdy basylym.
Hokýma 6 jasyna deıin Reseıde bilim alyp, keıin Ázerbaıjanǵa oralyp, zańger mamandyǵyn támamdaǵan. Ákesiniń aıtýynsha, qyzy árdaıym meıirimdi ári maqsatyna jetýge umtylǵan jan bolǵan.
"Ol ár sapardan qaıtyp kelgende, bizdi maqtan tutqanyńyzdy qalaımyn dep aıtatyn. Bir kúni qaıtyp kelip, ushaqtary qulaı jazdaǵanyn aıtqan edi... Biraq bul joly meniń qyzym oralmady," – deıdi marqumnyń ákesi.
Aıta keteıik, Aqtaýda qulaǵan ushaqta barlyǵy 67 adam, onyń ishinde 5 ekıpaj múshesi bolǵan. Qaza tapqandar sany – 38 adam. 29 adam jaraqat alyp, aýrýhanaǵa jetkizildi, olardyń ishinde eki bala bar. Jolaýshylardyń arasynda 6 Qazaqstan, 42 Ázerbaıjan, 3 Qyrǵyzstan jáne 16 Reseı azamaty bolǵan.
Qaza bolǵan qazaqstandyqtardyń aty-jónderi resmı túrde jarııalandy.
Apattyń sebepterin anyqtaý maqsatynda Úkimettik komıssııa qurylyp, qylmystyq is qozǵaldy.
