بۇگىن قر ۇلتتىق سپورت قاۋىمداستىعىنىڭ ۇيىمداستىرۋىمەن ءداستۇرلى «التىن تۇعىر» ۇلتتىق سىيلىعىن تابىستاۋ شاراسى ءوتتى.
ءداستۇرلى ساداق اتۋدان قر ۇلتتىق قۇراما كومانداسىنىڭ مۇشەسى ايكوركەم باتيحان جىلدىڭ ۇزدىك ساداقشىسى اتانىپ، قر ۇلتتىق سپورت قاۋىمداستىعىنىڭ ۇيىمداستىرۋىمەن ءداستۇرلى «التىن تۇعىر» ۇلتتىق سىيلىعىنا يە بولدى.
ايكوركەم قر چەمپيوناتىنىڭ كۇمىس جۇلدەگەرى، قر كۋبوگىنىڭ يەگەرى،
5-ءشى دۇنيجۇزىلىك كوشپەندىلەر ويىندارىنىڭ 2 جانە 3-ورىن يەگەرى.
“دالا مەرگەنى” الەم چەمپيوناتىندا جامبى نىساناسىنان 3-ورىن يەگەرى. سونداي-اق، وسى جىلى تۇركيا ەلىندە 33 مەملەكەتتىڭ قاتىسۋىمەن وتكەن “Fetih kupası” حالىقارالىق تۋرنيرىندە ەلىمىزدىڭ جالاۋىن جەلبىرەتىپ 1-ورىنعا يە بولىپ، قازاق ەلىنە تاريحي جەڭىس سىيلادى. ودان بولەك ەل ىشىندە دە ءبىرتالاي جارىستاردان ەكى جىل ىشىندە ەلەۋلى جەتىستىكتەرگە جەتتى.
““التىن تۇعىر 2024” ماراپاتىم مەن ءۇشىن ەڭ ۇلكەن جەتىستىگىم، ءبىر بەلەسىم. وكەن جىلى كورەرمەن بولىپ كەلسەم، بيىل ماعان بۇيىرىپتى. ەندى ارتىلعان جۇكتى ارى قاراي جالعاپ، ۇلكەن ناتيجە كورسەتەمىن دەپ ويلايمىن. بيىلعى جىلى باستى تاريحي جەڭىسىم تۇركيا ەلىندەگى جانە “كوشپەندىلەر ويىنىنداعى” جەڭىسىم. وسى جەتىستىكتەرىم “التىن تۇعىر-2024” ماراپاتىن الۋعا سەبەپ بولدى. بۇل مەنىڭ باپقا قاراعاندا باعىم دەسەم بولادى. باستى ماقساتىم - ۇلتتىق قۇندىلىقتى ساقتاۋ، دارىپتەۋ، كەيىنگى ۇرپاققا ءداستۇرلى ساداق اتۋ سپورتىن ۇلگى قىلۋ.”، - دەيدى ساداقشى قىز.
ايكوركەم جەتىستىكتەرىن تەك ءوز ەڭبەگىمەن ەمەس، جاتتىقتىرۋشىسىنىڭ بەرگەن قۇندى كەڭەستەرى مەن قولداۋىنىڭ ارقاسىندا قول جەتكىزگەنىن ايتادى. ال باپكەرى ءداستۇرلى ساداق اتۋ سپورتىنىڭ نەگىزىن قالاۋشى، قر ۇلتتىق قۇرامانىڭ باس باپكەرى دياس احمەتوۆ شاكىرتىنىڭ تاباندىلىعى مەن ەڭبەكقورلىعىن جوعارى باعالايدى، ءارى ونىڭ جەتىستىگىنە ءاردايىم سەنىپ، قولداپ كەلەدى.
“ايكوركەم سپورتتان حابارى بار سپورتشى. 18 جاسقا دەيىن اتا-اناسىنىڭ بەرگەن تاربيەسى، 7 جاسقا دەيىنگى قاتاڭ تالاپتارى، وسىنىڭ ءبارى ونى تۋعاننان باستاپ ءداستۇرلى ساداق اتۋدا چەمپيون بولۋعا دايىنداعان. بۇگىنگى “التىن تۇعىر 2024” ماراپاتى تەك ءبىر-ەكى جىل ىشىندە مەنىڭ جەتەكشىلىگىممەن العان اتاعى ەمەس، ءومىر بويى دايىندالعان ەڭبەگىنىڭ جەڭىسى. مەن تەك باعىت-باعدار بەرىپ، جەڭىسكە جەتۋىنە ۇلەس قوستىم.”، - دەيدى باپكەرى.
ءداستۇرلى ساداق اتۋ سپورتى تەك فيزيكالىق كۇش-جىگەردى عانا ەمەس، رۋحاني ۇيلەسىمدىلىكتى، توزىمدىلىكتى دە تالاپ ەتەدى.
سونداي اق، جاستارعا ءداستۇرلى سپورتتى ۇيرەتۋ جانە ولاردى ىنتالاندىرۋ ارقىلى ۇلتتىق مادەنيەتتى دارىپتەپ، تاريحىمىزدى جاڭعىرتۋ مۇمكىندىگى.
