قىتايدىڭ سيان قالاسىندا وتەتىن XIII حالىقارالىق جىبەك جولى كينوفەستيۆالى اياسىندا بيىل العاش رەت بالالار كينوسىنا ارنالعان ارنايى ءبولىم — «جىبەك جولى بالالارىنىڭ بىرگە ساپارى · بالالار كينو ماۋسىمى» ۇيىمداستىرىلدى.
جاڭا ءبولىمنىڭ باستى ماقساتى — جىبەك جولى بويىنداعى ەلدەر مەن ايماقتار بالالارىنىڭ كينو جانە مادەنيەت سالاسىنداعى شىعارماشىلىق بايلانىسىن نىعايتىپ، بالالار كينوسىنىڭ دامۋىنا قولداۋ كورسەتۋ.
بيىل اتالعان بايقاۋعا جىبەك جولى بويىنداعى مەملەكەتتەر مەن وڭىرلەردەن 61 بالالار ءفيلمى ۇسىنىلعان. 15 اكادەميالىق ساراپشىدان قۇرالعان الدىن الا ىرىكتەۋ كوميسسياسى تۋىندىلاردى بالالارعا ءتان شىنايى كوزقاراس، وقيعانىڭ اسەرلىلىگى، مادەني ەرەكشەلىك، كوركەمدىك دەڭگەي جانە جاڭاشىلدىق سەكىلدى نەگىزگى ولشەمدەر بويىنشا باعالاعان.
ناتيجەسىندە 61 ءفيلمنىڭ ىشىنەن 15 ۇزدىك بالالار ءفيلمى تاڭدالىپ، فينالدىق كەزەڭگە جولداما الدى.
ولاردىڭ قاتارىندا قازاقستاندىق رەجيسسەر جانىبەك نۇربەكۇلىنىڭ «ADAM: نارتاۋەكەل» اتتى تولىقمەترلى 3D انيماتسيالىق ءفيلمى دە بار.
بۇل — قازاقستاندىق انيماتسيا ءۇشىن ماڭىزدى جەتىستىك. فيلم ەندى حالىقارالىق كينوفەستيۆالدىڭ سوڭعى ساراپتاۋ كەزەڭىندە باق سىنايدى.
جەڭىمپازدار مەن ارنايى ماراپات يەلەرى 23 قىركۇيەكتە وتەتىن سوڭعى قازىلار القاسىنىڭ شەشىمىمەن انىقتالىپ، ماراپاتتاۋ ءراسىمى سول كۇنى ۇيىمداستىرىلادى.
