قازاقستان حالىقارالىق دەڭگەيدە اۆياتسيالىق قاۋىپسىزدىك سالاسىندا ۇلكەن جەتىستىككە جەتتى. ازاماتتىق اۆياتسيانىڭ حالىقارالىق ۇيىمى (يكاو) ەلىمىزدىڭ كورسەتكىشىن 95,7 پايىز دەپ باعالادى. بۇل – الەمدىك ورتاشا دەڭگەيدەن الدەقايدا جوعارى ناتيجە، دەپ حابارلايدى “ادىرنا”.
قازاقستان رەسپۋبليكاسى كولىك مينيسترلىگىنىڭ حابارلاۋىنشا، يكاو ساراپشىلارىنىڭ تەكسەرۋى 2025 جىلعى 30 تامىز بەن 15 قىركۇيەك ارالىعىندا جۇرگىزىلگەن.
دەرەك بويىنشا، الەمدىك ورتاشا كورسەتكىش 72 پايىزدى، ال ەۋروپاداعى ورتاشا دەڭگەي شامامەن 88 پايىزدى قۇرايدى. قازاقستان بۇل كورسەتكىشپەن ايماق ەلدەرىنىڭ كوبىنەن وزىپ، كاتار مەن بىرىككەن اراب امىرلىكتەرى سياقتى اۆياتسيا سالاسىندا الدىڭعى قاتارداعى مەملەكەتتەرگە جاقىندادى.
ۆەدومستۆونىڭ مالىمەتىنشە، قازىرگى كەزدە:
- ازەربايجان – 74,66%،
- وزبەكستان – 85,47%،
- قىرعىزستان – 85,76%،
- گرۋزيا – 89,75%،
- بەلارۋس – 91,85%،
- رەسەي – 94,14% كورسەتكىش كورسەتكەن.
ال كورشىلەس ايماقتاردا ءباا – 98,4%، كاتار – 96,72%، ساۋد ارابياسى – 94,41% دەڭگەيىندە تۇر.
وسىلايشا، قازاقستان يكاو-نىڭ ەۋرو-ازياتتىق ايماعىنداعى (EUR/NAT) اۆياتسيالىق قاۋىپسىزدىك بويىنشا ەڭ جوعارى ناتيجە كورسەتكەن ەلدەردىڭ ءبىرى اتاندى.
بۇعان دەيىن قازاقستاننىڭ كورسەتكىشى 83 پايىز دەڭگەيىندە بولعان. قازىر ول شامامەن 13 تارماققا ءوسىپ، جاڭا رەكورد ورناتتى. بۇل جەتىستىك اۆياتسيا سالاسىنداعى ەرەجەلەردى جاڭارتۋ، مامانداردى دايارلاۋ جانە اۋەجايلارداعى قاۋىپسىزدىك باقىلاۋىن كۇشەيتۋ جۇمىستارىنىڭ ناتيجەسى بولىپ وتىر.
سالا ماماندارىنىڭ ايتۋىنشا، مۇنداي جوعارى كورسەتكىشتەر قازاقستاننىڭ حالىقارالىق بەدەلىن ارتتىرىپ قانا قويماي، اقش-پەن تىكەلەي اۋە قاتىناستارىن اشۋعا، سونداي-اق شەتەلدىك اۆياكومپانيالاردى كوبىرەك تارتۋعا مۇمكىندىك بەرەدى.
ايتا كەتسەك، 2025 جىلدىڭ ماۋسىم ايىندا كولىك مينيسترلىگى قازاقستانداعى تەك سەگىز اۋەجايدىڭ عانا يكاو-نىڭ جوعارى ستاندارتتارىنا تولىق سايكەس كەلەتىنىن حابارلاعان بولاتىن.
