Búgin QR Ulttyq sport qaýymdastyǵynyń uıymdastyrýymen dástúrli «Altyn tuǵyr» ulttyq syılyǵyn tabystaý sharasy ótti.
Dástúrli sadaq atýdan QR ulttyq qurama komandasynyń múshesi Aıkórkem Batıhan jyldyń úzdik sadaqshysy atanyp, QR Ulttyq sport qaýymdastyǵynyń uıymdastyrýymen dástúrli «Altyn tuǵyr» ulttyq syılyǵyna ıe boldy.
Aıkórkem QR chempıonatynyń kúmis júldegeri, QR kýboginiń ıegeri,
5-shi Dúnıjúzilik Kóshpendiler oıyndarynyń 2 jáne 3-oryn ıegeri.
“Dala Mergeni” álem chempıonatynda jamby nysanasynan 3-oryn ıegeri. Sondaı-aq, osy jyly Túrkııa elinde 33 memlekettiń qatysýymen ótken “Fetih kupası” halyqaralyq týrnırinde elimizdiń jalaýyn jelbiretip 1-orynǵa ıe bolyp, qazaq eline tarıhı jeńis syılady. Odan bólek el ishinde de birtalaı jarystardan eki jyl ishinde eleýli jetistikterge jetti.
““Altyn tuǵyr 2024” marapatym men úshin eń úlken jetistigim, bir belesim. Óken jyly kórermen bolyp kelsem, bıyl maǵan buıyrypty. Endi artylǵan júkti ary qaraı jalǵap, úlken nátıje kórsetemin dep oılaımyn. Bıylǵy jyly basty tarıhı jeńisim Túrkııa elindegi jáne “Kóshpendiler oıynyndaǵy” jeńisim. Osy jetistikterim “Altyn tuǵyr-2024” marapatyn alýǵa sebep boldy. Bul meniń bapqa qaraǵanda baǵym desem bolady. Basty maqsatym - ulttyq qundylyqty saqtaý, dáripteý, keıingi urpaqqa dástúrli sadaq atý sportyn úlgi qylý.”, - deıdi sadaqshy qyz.
Aıkórkem jetistikterin tek óz eńbegimen emes, jattyqtyrýshysynyń bergen qundy keńesteri men qoldaýynyń arqasynda qol jetkizgenin aıtady. Al bapkeri Dástúrli sadaq atý sportynyń negizin qalaýshy, QR Ulttyq quramanyń bas bapkeri Dıas Ahmetov shákirtiniń tabandylyǵy men eńbekqorlyǵyn joǵary baǵalaıdy, ári onyń jetistigine árdaıym senip, qoldap keledi.
“Aıkórkem sporttan habary bar sportshy. 18 jasqa deıin ata-anasynyń bergen tárbıesi, 7 jasqa deıingi qatań talaptary, osynyń bári ony týǵannan bastap dástúrli sadaq atýda chempıon bolýǵa daıyndaǵan. Búgingi “Altyn tuǵyr 2024” marapaty tek bir-eki jyl ishinde meniń jetekshiligimmen alǵan ataǵy emes, ómir boıy daıyndalǵan eńbeginiń jeńisi. Men tek baǵyt-baǵdar berip, jeńiske jetýine úles qostym.”, - deıdi bapkeri.
Dástúrli sadaq atý sporty tek fızıkalyq kúsh-jigerdi ǵana emes, rýhanı úılesimdilikti, tózimdilikti de talap etedi.
Sondaı aq, jastarǵa dástúrli sportty úıretý jáne olardy yntalandyrý arqyly ulttyq mádenıetti dáriptep, tarıhymyzdy jańǵyrtý múmkindigi.
