يندونەزيانىڭ سيدواردجو قالاسىندا يسلام ينتەرنات مەكتەبىنىڭ عيماراتى قۇلاپ، 36 وقۋشى قازا تاپتى. بۇل تۋرالى ەلدىڭ تابيعي اپاتتاردىڭ زارداپتارىن جويۋ اگەنتتىگى حابارلادى، دەپ جازادى “ادىرنا” ۇلتتىق پورتالى Reuters اگەنتتىگىنە سىلتەپ.
اگەنتتىكتىڭ مالىمەتىنشە، ءالى دە 27 وقۋشى ءىز-ءتۇزسىز جوعالعاندار قاتارىندا. ولاردى ىزدەۋ جۇمىستارى جەتىنشى كۇن قاتارىنان جالعاسۋدا. قۇلاعان عيمارات استىندا قالعاندار — 13 پەن 19 جاس ارالىعىنداعى جاسوسپىرىمدەر.
قازىرگى تاڭدا قۇتقارۋ جۇمىستارىنىڭ 60 پايىزى اياقتالعان. ىزدەۋ-قۇتقارۋ شارالارىنا ارنايى تەحنيكالار، سونىڭ ىشىندە كراندار تارتىلعان. بيلىك دۇيسەنبى كۇنى ىزدەستىرۋ جۇمىستارىن تولىق اياقتاۋدى جوسپارلاپ وتىر.
ايتا كەتەيىك، بۇل قايعىلى وقيعا 30 قىركۇيەكتە بولعان. العاشقى مالىمەتتەر بويىنشا، 14 ادامنىڭ قازا تاپقانى حابارلاعان ەدىك. جالپى، اپات سالدارىنان 100-گە جۋىق ادام زارداپ شەككەن.
