Täuelsızdık künı qarsaŋynda ärtürlı şaralar ötedı. Balalardy patriottyqta baulu üşın būl - kerek närse. Bıraq sondaǧy aitylatyn äŋgımelerdıŋ keibırın jaŋartu kerek dep oilaimyn.
1) Älem.
Älem tanyǧan Qazaqstan, Abaidy älem tanyǧan, Şoqan älemdık jaŋalyq aşqan degen sekıldı, ne aitsa da älemdı qosyp aitu. Būl - Nūrsūltan Nazarbaev kezınde qalyptasqan ädet. Äleeeem, älem dep otyruşy edık qoi. Älemdık dın liderlerınıŋ sezı, EKSPO, älem tanyǧan Astana degendei. Osyny qoiu kerek. Ne bolsa da qazaqqa qanşalyq paidaly boldy, so jaǧynan kelu kerek. AQŞ halqynyŋ 70%-yna älemde ne bolyp jatqany qyzyq emes desedı. Öitkenı olarǧa özderı qyzyq. Olar jerdıŋ kındıgı. Al bızge özımızdıkınen basqanyŋ bärı qyzyq. Özımızdıkı älemge qyzyq bolsa ǧana özımızge qyzyq.
2) Mendeleev kestesı.
Bızdıŋ jerımız bai, jerımızdıŋ astynda Mendeleev kestesındegı barlyq element bar degen äŋgıme. Bar bolsa ne bolypty? Ol Liviiada da bar, azdap bolsa da keşegı qyrylyp jatqan Siriiada da bar. Venesuelllada da bar. Bar bolǧanynan bızge ne paida? Ol jerde bızdıŋ qandai eŋbegımız bar?
Bız jerdıŋ üstınde ömır sürıp jatqan adamdardyŋ jetıstıgı turaly aituymyz kerek. Ǧylymi jaŋalyq aşqandar, käsıp ūstap otyrǧandar, şynaiy öner jasap otyrǧandar. Osylardy aityp maqtanuymyz kerek.
3) 100-den astam ūlttar men ūlystar.
Qazaqstan köp ūltty el, 100-den astam ūlt ömır süredı degendı qoiu kerek. Odan da būrynǧy änūranda aitqandai, “bauyrǧa basqanbyz barşanyŋ balasyn” deuımız kerek. Bız barmyz, sosyn bızdıŋ qanatymyzdyŋ astynda ömır sürıp jatqan azyn-aulaq ūlt bar.
4) Elbasynyŋ arqasy.
Söz joq, Nūrsūltan Nazarbaevtyŋ eŋbegı bar, bıraq sol qiyn kezde ol kısımen bırge jūmys ıstegen qanşama adam bar, sol kezdegı qiyndyqqa şydaǧan halyq bar. Sony da aituymyz kerek. Eger jaqsylyqtyŋ bärı Nazarbaevtyŋ arqasy desek, onda qatelıktıŋ de bärı sol kısınıŋ kesırı bolyp qalady.
5) Ǧasyrlar boiy ata-babamyz aŋsaǧan täuelsızdık.
Bız Kenesary şähit bolǧannan keiın ǧana bırjola bodan boldyq. Sonda ainalasy bır-jarym ǧasyr orysqa täueldı boldyq degen söz. 1991 jyly täuelsızdıgımızdı qalpyna keltırdık. Osylai aitqanymyz abzal.
Balalarǧa qanşa qiyndyq körsek te aman şyqqan, myqty halyqpyz degen ideiany sıŋıruımız kerek.
“Talaidy ötkerdık, ötkenge salauat,
keleşek ǧajaiyp, keleşek ǧalamat,
Taǧdyrdyŋ tezınen, tozaqtyŋ özınen aman-sau qalyppyz, aman-sau qalyppyz”.
“Menıŋ elım, menıŋ jerım,
Gülıŋ bolyp egılemın,
Jyryŋ bolyp tögılemın, elım,
Tuǧan jerım menıŋ - Qazaqstanym!”
Arman Älmenbet
Ūqsas jaŋalyqtar
