قارجىلىق مونيتورينگ اگەنتتىگى Biz Birgemiz قوعامدىق قايىرىمدىلىق قورىنىڭ تەڭ قۇرىلتايشىسى جانە باسشىسى پەريزات قايراتقا قاتىستى تەرگەۋ بارىسىندا تاركىلەنگەن دۇنيە-مۇلىك تۋرالى اقپارات تاراتتى، دەپ حابارلايدى “ادىرنا” ۇلتتىق پورتالى.
“سوتتىڭ سانكتسياسىمەن قىلمىستىق جولمەن الىنعان قاراجاتقا ساتىپ الىنعان استانا قالاسىنداعى "Akbulak Riviera", "Highvill Ishim Gold", "كوك جايلاۋ" (تۇراق ورىندارىن قوسا العاندا), "Sensata Plaza" تك، سونداي-اق "Vela Village" كوتتەدج قالاشىعىنداعى ەليتالىق جىلجىمايتىن مۇلىك، Mercedes-Benz S450, Mercedes-Benz EQE 500, Lexus LX-600, Haval اۆتوموبيلدەرى تاركىلەندى.
پەريزات قايراتتىڭ تۇرعىلىقتى جەرىن ءتىنتۋ بارىسىندا قايىرىمدىلىققا جينالعان قاراجاتقا ساتىپ الىنعان قىمبات تەحنيكا، Cartier, Graff, Rolex, Bulgari, Gucci, Louis Vuitton, Versace, Chopard, Hermes, Dolce & Gabbana, Prada جانە ت. ب. سياقتى تانىمال الەمدىك برەندتەردىڭ كيىم، اياق كيىم، زەرگەرلىك بۇيىمدار، سومكەلەرى تابىلىپ، تاركىلەندى” دەلىنگەن حابارلامادا.
تاركىلەنگەن مۇلىك زاتتاي دالەلدەمەلەر رەتىندە تانىلىپ، ءىس ماتەريالدارىنا قوسىلعان.
اگەنتتىك پەريزات قايراتقا تيەسىلى قاراجاتتىڭ، جىلجىمايتىن مۇلىكتىڭ جانە باسقا دا مۇلىكتىڭ ورنالاسقان جەرى تۋرالى اقپاراتتى بىلگەن ادامداردى ارنايى نومەرگە: +7 (7172) 70-84-78, 70-84-79 (قوسىمشا ءنومىرى: 21384) حابارلاسۋدى سۇرايدى.
ەسكە سالا كەتەيىك، پەريزات قايرات «كومەككە جينالعان 1,5 ملرد تەڭگەنى جىمقىرعان» دەگەن كۇدىكپەن ۇستالىپ، تەرگەلىپ جاتىر.
16 قاراشا كۇنى قارجى مونيتورينگى اگەنتتىگى پەريزات قايرات پالەستيناعا دەپ اقشا جيناپ، تاعى 200 ملن تەڭگە جىمقىرعانىن راستادعان بولاتىن.
