عىلىم جانە جوعارى ءبىلىم مينيسترلىگى «بولاشاق» باعدارلاماسى بويىنشا ءبىلىم الىپ جاتقاندار تۋرالى جانە بيىل باعدارلاما اياسىندا ءبىلىم العانداردىڭ قانشاسى شەتەلدە قالعانى جايىندا مالىمەت بەردى، دەپ حابارلايدى "ادىرنا" ۇلتتىق پورتالى Kazinform اگەنتتىگىنە سىلتەمە جاساپ.
عىلىم جانە جوعارى ءبىلىم مينيسترلىگىنىڭ مالىمەتىنشە، قازىرگى ۋاقىتتا «بولاشاق» باعدارلاماسى اياسىندا 1 096 ستيپەنديات ءبىلىم الۋدا. ونىڭ 833-ءى ماگيستراتۋرادا، 145-ءى دوكتورانتۋرادا، ال 118-ءى تاعىلىمدامادان وتۋدە.
گۋمانيتارلىق باعىتتا 443 ادام، تەحنيكالىق ماماندىقتاردا 482 ادام، مەديتسينالىق سالادا 137 ادام، شىعارماشىلىق ماماندىقتاردا 34 ادام ءبىلىم الىپ جاتىر.
باعدارلاما قاتىسۋشىلارىنىڭ 51 پايىزى اقش پەن كانادادا، 35,7 پايىزى ۇلىبريتانيا مەن يرلانديادا، 6,1 پايىزى ەۋروپادا بولسا، تمد ەلدەرىندە 1,2 پايىزى ، ازيادا 2,3 پايىزى ، وكەانيادا 3,7 پايىزى وقۋدا.
2024 جىلى 230 ستيپەنديات وقۋىن ءساتتى اياقتادى. باعدارلاما اياسىندا ستپيەنديادان ءوز ەركىمەن باس تارتقاندار دا بار.
"شەتەلدە بولۋىنا بايلانىستى 2024 جىلى 12 ادام بارلىق شىعىندارىن وتەي وتىرىپ، ستيپەنديادان ايىرىلدى، 18 ادام بارلىق شىعىندارىن وتەي وتىرىپ، ءوز ەركىمەن ستيپەنديادان باس تارتتى" - دەلىنگەن عىلىم مينيسترلىگى اقپاراتىندا.
مينيسترلىك دەرەكتەرىنە سايكەس، قازىرگى كەزدە 562 ادام اكادەميالىق وقۋدا، 65 ادام تاعىلىمدامادان وتۋدە، ال 79 ادام وقۋدى كۇتىپ وتىر. 160 ادام اكادەميالىق وقۋدى اياقتاپ، ديپلومدارىن كۇتۋدە. باقىلاۋ جۇمىستارىندا 106 ادام بولسا، 49-ى ءتىل كۋرستارىنا دايىندىقتا، ال 18-ءى ءتىل كۋرستارىندا ءجۇر.
