امەريكا قۇراما شتاتتارىندا قازاق تىلىندە وقىتاتىن ءبىلىم شاڭىراعى اشىلادى. بەلسەندىلەر مەكتەپتەن بولەك، وسكەلەڭ ۇرپاقتى ۇلتتىق رۋحتا تاربيەلەۋ ءۇشىن دومبىرا جانە ءان-كۇي ۇيىرمەسىن قوسا اشۋدى جوسپارلاپ وتىر. بۇل جايلى "ادىرنا" ۇلتتىق پورتالى حابارلايدى.
اقش استاناسى ۆاشينگتوندا قازاق مەكتەبى اشىلادى. سەبەبى، بالاسىنا انا تىلىندە ءبىلىم بەرگىسى كەلەتىن اتا-انالار قاتارى جىل ساناپ ارتىپ كەلەدى. جات جۇرتتا قازاقتاردىڭ ءوز تامىرىنان اجىراپ قالماۋى ءۇشىن قازاق-امەريكان قاۋىمداستىعى بىرقاتار بەتبۇرىستارعا دەن قويۋعا دايار.
- قازىر قاراپ وتىرساق بەس، التى جاسقا كەلگەن بالالار بار. قازاق ءتىلىن وقيمىز دەپ جاتىر. قازاقستاننان وقۋلىق اكەلىپ جاتىرمىز. ءتىلدى ساقتاۋ ۇلكەن ماقسات ءبىزدىڭ. ءتىلدى، ءداستۇردى ساقتاۋ. ەرتەڭ ءبىز قازاقپىز، ءبىز وتانىمىز جوق، تامىرىمىز جوق ەمەس، ەلىمىز بار، تامىرىمىز بار، ءداستۇرىمىز بار دەپ سونداي بالالار ءوسسىن دەپ ويلايمىز، - دەيدى قازاق-امەريكان قاۋىمداستىعىنىڭ جەتەكشىسى دارحان نۇرماحانبەت.
قازاق ءتىلدى مەكتەپتەن بولەك، وسكەلەڭ ۇرپاقتى ۇلتتىق رۋحتا تاربيەلەۋ ءۇشىن بەلسەندىلەر دومبىرا ۇيىرمەسى اشىلىپ، «بالاۋسا» اتتتى حور قۇرىلماقشى.
اقش-تا الپىسىنشى جىلدارى نەبارى جيىرماعا جۋىق قازاق وتباسى بولسا، قازىرگى تاڭدا قانداستاردىڭ قاتارى ەسەلىپ ءوسىپ، سانى 100 مىڭعا جۋىقتاعان. ونىڭ ءبىر بولىگى تۇركيا، موڭعوليا، قىتاي سەكىلدى مەملەكەتتەردەن كەلگەن قانداستار. قازاق دياسپوراسىنىڭ ەڭ كوپ شوعىرلانعان جەرى - نيۋ-يورك قالاسى. ودان كەيىنگى ورىندا مايامي، لوس-انجەلەس پەن چيكاگودا قالالارى كوش تۇزەيدى.
"ادىرنا" ۇلتتىق پورتالى
