رۋمىنيانىڭ كونستيتۋتسيالىق سوتى 6 جەلتوقسان كۇنى رۋمىنيا پرەزيدەنتىنىڭ العاشقى سايلاۋ ناتيجەلەرىن جارامسىز دەپ تانىپ، داۋىس بەرۋ قايتا وتكىزىلۋى كەرەك دەگەن شەشىم شىعاردى، دەپ حابارلايدى “ادىرنا” ۇلتتىق پورتالى DW سايتىنا سىلتەپ.
ەندى سايلاۋ الداعى كۇندەردە وتەدى، ولاردى ۇكىمەت انىقتايدى، دەپ مالىمدەدى سوت.
ەكى كۇن بۇرىن قازىرگى پرەزيدەنت كلاۋس يوحاننيس رەسەيدىڭ الەۋمەتتىك جەلىلەردە ۋلتراۇلتشىل ساياساتكەر كەلين دجوردجەسكۋدى قولداعان اۋقىمدى ناۋقانى تۋرالى بارلاۋ دەرەكتەرىن جاريالادى. 24 قاراشادا وتكەن العاشقى سايلاۋدا دجوردجەسكۋ كۇتپەگەن جەردەن رۋمىنيانىڭ "قۇتقارۋ وداعى" ليبەرالدى پارتياسىنىڭ وكىلى ەلەنا لاسكونيدەن وزىپ كەتكەن ەدى.
كەلين دجوردجەسكۋ ايتارلىقتاي سايلاۋ ناۋقانىن جۇرگىزگەن جوق. تەلەدەباتتارعا قاتىسپادى جانە ءوز مالىمدەمەسىنە سايكەس، ءتىپتى اقشا دا جۇمساماعان. الەۋمەتتىك ساۋالنامالار بۇرىنعى ۋلتراۇلتشىلدىق "رۋمىنداردىڭ بىرىگۋى اليانسى" پارتياسىنىڭ مۇشەسى بولىپ، تاۋەلسىز كانديدات رەتىندە قاتىسقان دجوردجەسكۋ تەك بىرنەشە پايىز داۋىس جيناۋى مۇمكىن دەپ كورسەتتى. الايدا العاشقى سايلاۋعا ەكى اپتا قالعاندا TikTok الەۋمەتتىك جەلىسىندە ونىڭ قولداۋىنا ارنالعان اۋقىمدى ناۋقان باستالدى، وندا رۋمىنيانىڭ بارلاۋ قىزمەتىنىڭ مالىمەتى بويىنشا 25 مىڭنان استام اككاۋنت پايدالانىلعان.
ناتيجەسىندە دجوردجەسكۋ شامامەن 23 پايىز داۋىس جينادى. ەلەنا لاسكوني 19 پايىزدان استام قولداۋعا يە بولىپ، قازىرگى پرەمەر-مينيستر، سوتسيال-دەموكرات مارچەل چولاكتان ءسال وزىپ كەتتى. ءتورتىنشى ورىندا – ۇلتتىق راديكال دجوردج سيميون، ول شامامەن 14 پايىز داۋىس جينادى.
28 قاراشادا كونستيتۋتسيالىق سوت ورتالىق سايلاۋ كوميسسياسىن العاشقى سايلاۋ ناتيجەلەرىن قايتا ەسەپتەۋگە مىندەتتەدى. بىراق 2 جەلتوقساندا ونى بەكىتتى. ەكىنشى تۋر 8 جەلتوقساندا وتكىزىلۋى ءتيىس ەدى.
