رەسەي پرەزيدەنتى ۆلاديمير پۋتين ۋكرايناداعى كەي اۋماقتاردى رەسەيگە قوسۋ تۋرالى مالىمدەمەنى 30 قىركۇيەك كۇنى پارلامەنت پالاتالارىنىڭ الدىندا جاساماق. بۇل تۋرالى بۇگىن بريتان بارلاۋشىلارى مالىمدەدى، دەپ حابارلايدى “ادىرنا” ۇلتتىق پورتالى.
«ۆەدوموستي» گازەتىنىڭ دەرەگىنشە، لۋگانسك، دونەتسك، زاپوروجە، حەرسون وبلىسىنىڭ رەسەي باسىپ العان بولىكتەرى، قىرىم فەدەرالدىق وكرۋگىنە تۇبەكتىڭ وزىمەن بىرگە كىرگىزىلىپ، ونى «روسكوسموستىڭ» بۇرىنعى جەتەكشىسى دميتري روگوزين باسقارماق.
بۇگىن اتالعان ايماقتاردا رەسەيگە قوسىلۋ تۋرالى «رەفەرەندۋم» اياقتالىپ جاتىر. ولاردىڭ ەشقايسىن رەسەي اسكەرى تولىق باسىپ الا المادى. سوعان قاراماستان، ماسكەۋ داۋىس بەرۋگە قاتىسقانداردىڭ سانى، رەكوردتىق دەڭگەيگە جەتكەنىن ايتىپ وتىر.
ۋكراينا پرەزيدەنتى ۆلاديمير زەلەنسكي بولسا، رەفەرەندۋمننان كەيىن كرەملمەن ديپلوماتيالىق كەلىسسوزدەردىڭ مۇلدە توقتايتىنىن ەسكەرتتى.
”ادىرنا” ۇلتتىق پورتالى
