بۇگىن قازاقتىڭ ابىزى، ايگىلى قالامگەر، حالىق جازۋشىسى ءابىش كەكىلباەۆتىڭ تۋعانىنا - 85 جىل. ول - كەمەلدىلىك پەن پاراساتقا تولى شىعارمالارى ارقىلى حالىق جادىندا ماڭگى ساقتالعان تۇلعا.
قالامگەر 1939 جىلى ماڭعىستاۋ وڭىرىندە دۇنيەگە كەلگەن. قازاق مەملەكەتتىك ۋنيۆەرسيتەتىنىڭ فيلولوگيا فاكۋلتەتىندە ءبىلىم الىپ، ەڭبەك جولىن «قازاق ادەبيەتى» گازەتىنەن باستاعان. بىرقاتار قىزمەتتەردە جەمىستى ەڭبەك اتقارىپ، ەل تاۋەلسىزدىگىن العان تۇستا تۇڭعىش مەملەكەتتىك حاتشى، پارلامەنت ءماجىلىسىنىڭ دەپۋتاتى، جوعارعى كەڭەس توراعاسى بولدى.
ءابىش كەكىلباەۆ قازاق مەملەكەتتىلىگىن قالىپتاستىرۋ جولىندا كوپ ەڭبەك ءسىڭىردى.
ونىڭ شىعارمالىرى - قازاق ادەبيەتىنىڭ قۇندى قازىناسى. حالقىمىزدىڭ عانا ەمەس، الەمنىڭ جازۋشىسىنا اينالعان قالامگەر ارتىندا وشپەس مۇرا قالدىرا ءبىلدى.
اۋىل ومىرىنەن جازىلعان پوۆەست، اڭگىمەلەر جيناعى «دالا باللادالارى» - جازۋشىنىڭ كەڭ تىنىستى ەپيك، سۋرەتكەرلىك بولاشاعىن تانىتادى. 1974 جىلى «داۋىرمەن بەتپە-بەت» سىن ماقالالار جيناعى، 1979 جىلى «تىراۋ-تىراۋ تىرنالار»، 1982 جىلى «شىڭىراۋ» پوۆەستەر جيناعى، 1992-1993 جىلدارى تاڭدامالى ەكى تومدىق، 1995 جىلى «زامانمەن سۇحبات»، 1998 جىلى «ازاتتىقتىڭ اق تاڭى»، پۋبليتسيستيكالىق ماقالالارى، تولعامدارى، 1999 جىلى 12 تومدىق شىعارمالار جيناعى جارىققا شىقتى.
ءابىش كەكىلبايۇلىنىڭ «ۇركەر» (1981), «ەلەڭ-الاڭ» (1984) روماندارى قازاق ادەبيەتىنىڭ ۇلكەن تابىسى رەتىندە باعالانىپ، قازاق كسر مەملەكەتتىك سىيلىعىن الدى.
2001 جىلى شىققان «تالايعى تاراز»، 2002 جىلى شىققان «شاندوز» تاريحي تاقىرىپتى عىلىمي دايەكپەن، دەرەكپەن تۇسىنىكتى ۇعىمدى ەتىپ جەتكىزۋدىڭ جاڭا باعىت-باعدارىن بەلگىلەپ بەردى. 2009 جىلى «سىر دەستە» دەپ اتالاتىن اۆتوردىڭ كوپجىلدىق وي-تولعاۋلارى، ەسسە، ەستەلىك، سويلەگەن سوزدەرىنىڭ بەستومدىق جيناعى جارىققا شىقتى.
سانالى عۇمىرىندا تەك جازۋشى عانا ەمەس، قوعام قايراتكەرى رەتىندە دە تانىلا بىلگەن ءابىش كەكىلبايۇلى 1996-2002 جىلدارى قازاقستان رەسپۋبليكاسىنىڭ العاشقى مەملەكەتتىك حاتشىسى قىزمەتىن اتقاردى. قر پارلامەنتى سەناتىنىڭ، ءماجىلىسىنىڭ، ودان بۇرىن قازاقستان جوعارعى كەڭەسىنىڭ دەپۋتاتى بولدى.
