Bügın qazaqtyŋ abyzy, äigılı qalamger, Halyq jazuşysy Äbış Kekılbaevtyŋ tuǧanyna - 85 jyl. Ol - kemeldılık pen parasatqa toly şyǧarmalary arqyly halyq jadynda mäŋgı saqtalǧan tūlǧa.
Qalamger 1939 jyly Maŋǧystau öŋırınde düniege kelgen. Qazaq Memlekettık universitetınıŋ filologiia fakultetınde bılım alyp, eŋbek jolyn «Qazaq ädebietı» gazetınen bastaǧan. Bırqatar qyzmetterde jemıstı eŋbek atqaryp, el Täuelsızdıgın alǧan tūsta Tūŋǧyş memlekettık hatşy, Parlament Mäjılısınıŋ deputaty, Joǧarǧy Keŋes Töraǧasy boldy.
Äbış Kekılbaev qazaq memlekettılıgın qalyptastyru jolynda köp eŋbek sıŋırdı.
Onyŋ şyǧarmalyry - qazaq ädebietınıŋ qūndy qazynasy. Halqymyzdyŋ ǧana emes, älemnıŋ jazuşysyna ainalǧan qalamger artynda öşpes mūra qaldyra bıldı.
Auyl ömırınen jazylǧan povest, äŋgımeler jinaǧy «Dala balladalary» - jazuşynyŋ keŋ tynysty epik, suretkerlık bolaşaǧyn tanytady. 1974 jyly «Däuırmen betpe-bet» syn maqalalar jinaǧy, 1979 jyly «Tyrau-tyrau tyrnalar», 1982 jyly «Şyŋyrau» povester jinaǧy, 1992-1993 jyldary Taŋdamaly ekı tomdyq, 1995 jyly «Zamanmen sūhbat», 1998 jyly «Azattyqtyŋ aq taŋy», publisistikalyq maqalalary, tolǧamdary, 1999 jyly 12 tomdyq şyǧarmalar jinaǧy jaryqqa şyqty.
Äbış Kekılbaiūlynyŋ «Ürker» (1981), «Eleŋ-alaŋ» (1984) romandary qazaq ädebietınıŋ ülken tabysy retınde baǧalanyp, Qazaq KSR Memlekettık syilyǧyn aldy.
2001 jyly şyqqan «Talaiǧy Taraz», 2002 jyly şyqqan «Şandoz» tarihi taqyrypty ǧylymi däiekpen, derekpen tüsınıktı ūǧymdy etıp jetkızudıŋ jaŋa baǧyt-baǧdaryn belgılep berdı. 2009 jyly «Syr deste» dep atalatyn avtordyŋ köpjyldyq oi-tolǧaulary, esse, estelık, söilegen sözderınıŋ bestomdyq jinaǧy jaryqqa şyqty.
Sanaly ǧūmyrynda tek jazuşy ǧana emes, qoǧam qairatkerı retınde de tanyla bılgen Äbış Kekılbaiūly 1996-2002 jyldary Qazaqstan Respublikasynyŋ alǧaşqy Memlekettık hatşysy qyzmetın atqardy. QR Parlamentı Senatynyŋ, Mäjılısınıŋ, odan būryn Qazaqstan Joǧarǧy keŋesınıŋ deputaty boldy.
