اقش وڭتۇستىك كورەيا پرەزيدەنتى يۋن سوك يول ەنگىزگەن اسكەري جاعدايعا بايلانىستى جاعدايدىڭ دامۋىن "تەرەڭ الاڭداۋشىلىقپەن" باقىلاپ وتىر. بۇل تۋرالى اقش مەملەكەتتىك حاتشىسىنىڭ ءبىرىنشى ورىنباسارى كۋرت كەمپبەلل مالىمدەدى، دەپ حابارلايدى "ادىرنا" ۇلتتىق پورتالى DW-گە سىلتەمە جاساپ.
ء"بىز كەز كەلگەن ساياسي كەلىسپەۋشىلىكتەردىڭ بەيبىت جولمەن جانە زاڭ ۇستەمدىگىنە سايكەس شەشىلەدى دەپ ۇمىتتەنەمىز جانە سونى كۇتەمىز", – دەدى كەمپبەلل.
اق ءۇيدىڭ ۇلتتىق قاۋىپسىزدىك كەڭەسىندە اقش بيلىگى قازىرگى وقيعالارعا بايلانىستى سەۋل ۇكىمەتىمەن بايلانىستا ەكەنىن اتاپ ءوتتى.
كەيىنىرەك، اقش مەملەكەتتىك دەپارتامەنتىنىڭ وكىلى ۆەدانت پاتەل ۆاشينگتون سەۋلدەگى پارلامەنت دەپۋتاتتارىنىڭ شەشىمىن قولدايتىنىن ايتتى. "ارينە، ءبىز ەل زاڭدارىنىڭ جانە ەرەجەلەرىنىڭ ساقتالۋىن كۇتەمىز جانە قولدايمىز. بۇل ۇلتتىق اسسامبلەياداعى داۋىس بەرۋگە دە قاتىستى", – دەدى پاتەل ۆاشينگتوندا وتكەن جۋرناليستەرگە ارنالعان بريفينگتە.
وڭتۇستىك كورەيا پارلامەنتى اسكەري جاعدايعا قارسى شىعىپ، ونى جويۋعا 300 دەپۋتاتتىڭ ىشىنەن 190-ى داۋىس بەردى. ناتيجەسىندە اسكەري جاعداي جويىلعانى حابارلاندى.
ۆاشينگتون – وڭتۇستىك كورەيانىڭ ايماقتاعى باستى وداقتاسى. اقش بۇل ەلدە 28 500 اسكەري قىزمەتكەرىن ورنالاستىرعان، ولاردىڭ ماقساتى – يادرولىق قارۋعا يە سولتۇستىك كورەيادان قورعاۋ. اقش پەن وڭتۇستىك كورەيا ۇنەمى بىرلەسكەن اسكەري جاتتىعۋلار وتكىزەدى.
اقش پرەزيدەنتى دجو بايدەن كحدر مەن قىتايعا قارسى تەپە-تەڭدىك رەتىندە سەۋل، توكيو جانە ۆاشينگتون كواليتسياسىن نىعايتۋعا تىرىسۋدا. بيىل بايدەننىڭ باستاماسىمەن وڭتۇستىك كورەيا پرەزيدەنتى الەمدەگى دەموكراتيالىق ينستيتۋتتاردى قورعاۋ ستراتەگيالارىن تالقىلاعان سامميت وتكىزدى.
وڭتۇستىك كورەيا مەن سولتۇستىك كورەيا رەسمي تۇردە سوعىس جاعدايىندا. سەبەبى 1953 جىلعى كەلىسىم بويىنشا كورەيا سوعىسى بىتىمگەرشىلىك كەلىسىمىمەن ەمەس, بىتىممەن اياقتالدى.
