1 جەلتوقسان كۇنى قازاقستان، قىرعىزستان، تاجىكستان، تۇرىكمەنستان، وزبەكستان جانە قىتايدىڭ سىرتقى ساياسي ۆەدومستۆولارىنىڭ باسشىلارىن بىرىكتىرگەن «ورتالىق ازيا – قىتاي» فورماتىنداعى سىرتقى ىستەر مينيسترلەرىنىڭ بەسىنشى كەزدەسۋى ءوتتى، دەپ حابارلايدى «ادىرنا» ءتىلشىسى.
قازاقستاندىق دەلەگاتسيانى پرەمەر-ءمينيستردىڭ ورىنباسارى – سىرتقى ىستەر ءمينيسترى مۇرات نۇرتىلەۋ باستاپ ءجۇردى.
«كەزدەسۋدە تاراپتار ساياسي ديالوگتى تەرەڭدەتۋگە، ەكونوميكالىق بايلانىستاردى دامىتۋعا جانە مادەني-گۋمانيتارلىق الماسۋلاردى نىعايتۋعا ءوز مىندەتتەمەلەرىن راستادى. مينيسترلەر «ءوڭىردىڭ تۇراقتىلىعى، قاۋىپسىزدىگى جانە ورنىقتى دامۋى» تۇجىرىمداماسى شەڭبەرىندە بىرلەسكەن جۇمىستى جالعاستىرۋدىڭ ماڭىزدىلىعىن اتاپ ءوتتى»،—دەپ جازدى ءسىم ءباسپاسوز قىزمەتى.
كەزدەسۋ بارىسىندا سۋ رەسۋرستارىن، جاڭارتىلاتىن ەنەرگەتيكانى جانە قورشاعان ورتانى قورعاۋدى قوسا العاندا، ەكولوگيالىق تۇراقتىلىق سالاسىنداعى ىنتىماقتاستىقتى ارتتىرۋ ۋاعدالاستىعىنا قول جەتكىزىلدى. سونداي-اق، حالىقتار اراسىنداعى ءوزارا تۇسىنىستىكتى نىعايتۋ ءۇشىن ءبىلىم، تۋريزم جانە مادەنيەت سالاسىنداعى الماسۋ باعدارلامالارىن تەرەڭدەتۋ تۋرالى شەشىم قابىلداندى.
تاراپتار 2025 جىلى «ورتالىق ازيا – قىتاي» فورماتىنداعى كەلەسى كەزدەسۋدى قازاقستاندا وتكىزۋگە كەلىستى.
