مەملەكەت باسشىسى قاسىم-جومارت توقاەۆ بريۋسسەلدە ەۋروپالىق كەڭەستىڭ پرەزيدەنتى انتونيۋ كوشتا جانە ەۋروپالىق كوميسسيانىڭ پرەزيدەنتى ۋرسۋلا فون دەر ليايەنمەن كەزدەسۋ وتكىزدى، دەپ حابارلايدى "ادىرنا" ۇلتتىق پورتالى.
باسشىلار كەزدەسۋىندە قازاقستان مەن ەۋروپالىق وداق اراسىنداعى سەرىكتەستىكتى ودان ءارى دامىتۋ ماسەلەلەرى تالقىلاندى.
كەلىسسوزدەر بارىسىندا پرەزيدەنت ەكىجاقتى قارىم-قاتىناس سوڭعى جىلدارى جاڭا ساپالى دەڭگەيگە كوتەرىلگەنىن اتاپ ءوتتى. ونىڭ ايتۋىنشا، ءوزارا سەنىم مەن قۇرمەتكە نەگىزدەلگەن ىنتىماقتاستىق بۇگىندە ستراتەگيالىق سيپات الىپ، ءتۇرلى سالاداعى بايلانىستاردى كەڭەيتۋگە مۇمكىندىك بەرىپ وتىر.
پرەزيدەنت توقاەۆ قازاقستاننىڭ ەۋروپالىق وداقپەن ءوزارا ءتيىمدى ارىپتەستىكتى نىعايتۋعا مۇددەلى ەكەنىن ايتىپ، جاقىندا قول قويىلعان قۇجاتتار مەن مەموراندۋمدار وسى باعىتتاعى جۇمىستىڭ ناقتى ناتيجەسى ەكەنىن جەتكىزدى. سونداي-اق ول ەلىمىز ەو-مەن كەڭەيتىلگەن سەرىكتەستىك جانە ىنتىماقتاستىق تۋرالى كەلىسىمگە قول قويعان جانە ونى راتيفيكاتسيالاعان ورتالىق ازياداعى العاشقى مەملەكەت ەكەنىن ەسكە سالدى. كەزدەسۋ بارىسىندا ساۋدا-ەكونوميكالىق جانە ينۆەستيتسيالىق ىنتىماقتاستىققا ەرەكشە كوڭىل ءبولىندى. پرەزيدەنتتىڭ ايتۋىنشا، ەۋروپالىق وداق قازاقستاننىڭ نەگىزگى ساۋدا جانە ينۆەستيتسيالىق سەرىكتەستەرىنىڭ ءبىرى سانالادى. ەۋروپالىق كومپانيالار ەل ەكونوميكاسىنىڭ ءتۇرلى سەكتورلارىندا بەلسەندى جۇمىس ىستەپ، ينۆەستيتسيالىق جوبالاردى جۇزەگە اسىرىپ كەلەدى.
ءوز كەزەگىندە ەۋروپالىق كوميسسيانىڭ پرەزيدەنتى ۋرسۋلا فون دەر ليايەن سوڭعى ون جىلدا قازاقستان مەن ەۋروپالىق وداق اراسىنداعى ساۋدا اينالىمى ايتارلىقتاي ءوسىپ، ءوزارا بايلانىستاردىڭ قارقىنى كۇشەيگەنىن ايتتى. ول تاراپتاردىڭ اۋىل شارۋاشىلىعى سياقتى باعىتتاردا ارىپتەستىكتى ارتاراپتاندىرۋعا، ساۋداداعى كەدەرگىلەردى ازايتۋعا جانە ينۆەستيتسيالىق مۇمكىندىكتەردى كەڭەيتۋگە مۇددەلى ەكەنىن جەتكىزدى.
ۋرسۋلا فون دەر ليايەن حابارلاۋىنشا، قازاقستان مەن ەۋروپالىق وداق اراسىنداعى ۆيزالىق رەجيمدى جەڭىلدەتۋ ماسەلەسى بويىنشا جۇرگىزىلىپ جاتقان كەلىسسوزدەر اياقتالۋعا جاقىن. ول تاراپتار ۆيزالىق راسىمدەردى جەڭىلدەتۋ جانە رەادميسسيا تۋرالى كەلىسىمدەر بويىنشا بەلسەندى جۇمىس جۇرگىزىپ جاتىر. قازىرگى تاڭدا وسى باعىتتاعى كەلىسسوزدەر ءىس جۇزىندە سوڭعى كەزەڭىنە جەتكەن.
