قىرعىزستان قازاقستانمەن شەكاراداعى جەر تەلىمدەرىن تەڭ دارەجەدە ايىرباستاۋ تۋرالى ۇسىنىس جاسادى، دەپ حابارلايدى “ادىرنا” ۇلتتىق پورتالى.
بۇل تۋرالى قىرعىزستان پرەزيدەنتىنىڭ ءباسپاسوز حاتشىسى اسقات الاگوزوۆ مالىمدەدى.
ونىڭ ايتۋىنشا، بىشكەك تاراپى قازاقستانعا توقماق قالاسى ماڭىنداعى جولدىڭ 800 مەترلىك ۋچاسكەسىنە قاتىستى جەر الماسۋ جونىندە ۇسىنىس جولداعان.
الاگوزوۆتىڭ سوزىنشە، اتالعان جوبا جۇزەگە اسقان جاعدايدا الماتى كوشەسىنەن كەمين قالاسىنا دەيىنگى ۇزىندىعى شامامەن 150 شاقىرىم بولاتىن اقىلى اۆتوماگيسترال سالۋعا مۇمكىندىك تۋادى. جاڭا جول وڭىردەگى كولىك قاتىناسىن جاقسارتۋعا باعىتتالعان.
قىرعىزستان پرەزيدەنتىنىڭ وكىلى شەكارانى دەليميتاتسيالاۋ مەن دەماركاتسيالاۋ ماسەلەلەرىندە وزبەكستانمەن اراداعى تاجىريبەنى مىسالعا كەلتىردى. ونىڭ ايتۋىنشا، جۇرگىزىلگەن كەلىسسوزدەر ناتيجەسىندە بۇرىن وزبەكستاننىڭ فەرعانا وبلىسىنا قاراعان شوڭقارا جانە تاش-توبە اۋىلدارى قىرعىزستان قۇرامىنا وتكەن.
قازىرگى تاڭدا بۇل ەلدى مەكەندەردە شامامەن 2,5 مىڭ ادام تۇرادى. تۇرعىنداردىڭ باسىم بولىگى – ەتنيكالىق قىرعىزدار. ءتيىستى تىركەۋ راسىمدەرى اياقتالعاننان كەيىن ولار قىرعىزستان ازاماتتىعىن الۋ مۇمكىندىگىنە يە بولادى.
ءوز كەزەگىندە قىرعىزستان وزبەكستانعا شەكارا ماڭىنداعى تەڭ دارەجەلى جەر تەلىمدەرىن بەرگەن. سونىمەن قاتار ەكى ەل باتكەن وبلىسىنداعى ساي مەن تايان اۋىلدارىن بايلانىستىراتىن جول قۇرىلىسى ءۇشىن 236 گەكتار جەردى ءوزارا ايىرباستاعان. ناتيجەسىندە ايداركەننەن باتكەنگە دەيىنگى جول ۇزاقتىعى 225 شاقىرىمنان 55 شاقىرىمعا دەيىن قىسقارماق.
