اسكەري قىزمەت بارىسىندا اۋىر جاراقات الىپ، ۇزاق ۋاقىت بويى ەم قابىلداعان ەربايان مۇحتار قايتىس بولدى، دەپ حابارلايدى "ادىرنا" ۇلتتىق پورتالى.
بۇل اقپاراتتى ونىڭ اناسى گۇلسىم قاميەۆا جۋرناليستەرگە حابارلاعان. باق دەرەگىنشە، وتباسىنىڭ زاڭگەرى اقپاراتتى راستاعان.
الدىن الا مالىمەت بويىنشا، ەربايان مۇحتار استاناداعى ۇلتتىق شۇعىل مەديتسينانى ۇيلەستىرۋ ورتالىعىندا كوز جۇمعان.
ايتا كەتەيىك، ول 2024 جىلى الماتى قالاسىنداعى №5571 اسكەري بولىمىنە مەرزىمدى اسكەري قىزمەتكە شاقىرىلعان. قىزمەت بارىسىندا باس-مي جاراقاتىن الىپ، كەيىن بىرنەشە اي بويى كومادا جاتقان.
رەسمي نۇسقا بويىنشا، سارباز اسكەري ءبولىم اۋماعىنداعى اجەتحانادا قۇلاپ، جاراقات العان. الايدا ونىڭ جاقىندارى بۇل تۇسىندىرمەگە كۇمان كەلتىرىپ، وقيعانىڭ تولىق ءارى ءادىل تەرگەلۋىن تالاپ ەتكەن.
دارىگەرلەر ەربايان مۇحتارعا ميدىڭ اۋىر كونتۋزياسى، سۋبدۋرالدى گەماتوما، باس سۇيەگىنىڭ سىنۋى جانە مي ءىسىنۋى دياگنوزدارىن قويعان. ول بىرنەشە كۇردەلى وتادان وتكەنىنە قاراماستان، دارىگەرلەر ونىڭ ءومىرىن ساقتاپ قالا المادى.
21 جاستاعى ەربايان مۇحتار اسكەرگە شاقىرىلعانعا دەيىن جوعارى وقۋ ورنىندا ءبىلىم الىپ، فۋتبولمەن اينالىسقان. جاقىندارىنىڭ ايتۋىنشا، ونىڭ بولاشاققا قويعان جوسپارلارى كوپ بولعان.
قازىر وقيعانىڭ بارلىق ءمان-جايى انىقتالۋدا.
