دەنساۋلىق ساقتاۋ مينيسترلىگى ۇلتتىق شۇعىل مەديتسينانى ۇيلەستىرۋ ورتالىعىمەن بىرلەسىپ، ۇلتتىق ۇلاننىڭ بۇرىنعى اسكەري قىزمەتشىسى ەربايان مۇحتاردىڭ قايتىس بولۋىنا بايلانىستى وتباسىنا كوڭىل ايتتى، دەپ حابارلايدى "ادىرنا" ۇلتتىق پورتالى.
رەسمي مالىمەتكە سايكەس، دارىگەرلەر ءۇش جىلعا جۋىق ۋاقىت بويى ناۋقاستىڭ ءومىرىن ساقتاپ قالۋ ءۇشىن ۇزدىكسىز كۇرەس جۇرگىزگەن. الايدا مەرزىمدى اسكەري قىزمەتىن وتەۋ كەزىندە العان اۋىر باس-مي جاراقاتى سالدارىنان ميىندا قايتىمسىز وزگەرىستەر ورىن الىپ، ونىڭ ءومىرىن امان الىپ قالۋ مۇمكىن بولماعان.
مينيسترلىكتىڭ حابارلاۋىنشا، مۇحتار ەربايان 2023 جىلدان بەرى اسا اۋىر جاعدايدا بولىپ، ۇزاق ۋاقىت تۇراقتى ۆەگەتاتيۆتىك كۇيدە جاتقان. وعان رەسپيراتورلىق قولداۋ كورسەتىلىپ، قارقىندى تەراپيا جۇرگىزىلگەنىمەن، ۋاقىت وتە كەلە قانداعى وتتەگى دەڭگەيىنىڭ تومەندەۋى، جۇرەك ىرعاعىنىڭ بۇزىلۋى جانە گەموديناميكانىڭ تۇراقسىزدىعى بايقالعان.
دارىگەرلەر ناۋقاسقا رەانيماتسيالىق جانە ەمدىك شارالاردى تولىق كولەمدە كورسەتكەنىن حابارلاعان. سونىمەن قاتار ءىىم مەن دەنساۋلىق ساقتاۋ مينيسترلىگىنىڭ بىرلەسكەن ۇيىمداستىرۋىمەن ول ەم قابىلداۋ ءۇشىن تۇركيا رەسپۋبليكاسىنا جىبەرىلىپ، شەتەلدىك ماماندار باستاپقى دياگنوزدى راستاعان.
2026 جىلدىڭ ماۋسىم ايىندا نەگىزگى سىرقاتتىڭ اياسىندا ينفەكتسيالىق اسقىنۋلار، سەپسيس جانە كوپ اعزالىق جەتكىلىكسىزدىك سيندرومى دامىعان.
رەسمي دەرەككە سايكەس، 2026 جىلعى 23 ماۋسىم كۇنى ساعات 21:40-تا ناۋقاستىڭ بيولوگيالىق ءولىمى تىركەلدى. دارىگەرلەر ءولىمنىڭ تىكەلەي سەبەبى رەتىندە اۋىر باس-مي جاراقاتىنىڭ سالدارى مەن سونىڭ اياسىندا ورشىگەن كوپ اعزالىق جەتكىلىكسىزدىك سيندرومىن اتادى.
