قازاقستان مەن رەسەي مەكتەپتەرىندە ۇلى جەڭىسكە ارنالعان بىرلەسكەن بايقاۋ وتكىزۋ جوسپارلانۋى مۇمكىن، دەپ حابارلايدى "ادىرنا" ۇلتتىق پورتالى astanatv-عا سىلتەپ.
بۇل يدەيانى استانادا وتكەن قازاقستان-رەسەي عىلىمي فورۋمىندا رەسەيلىك عالىمدار ۇسىنعان. استانادا وتكەن قازاقستان-رەسەي فورۋمى ەكى ەلدىڭ جەتەكشى تاريحشى عالىمدارى مەن مەملەكەتتىك جانە قوعام قايراتكەرلەرىن بىرىكتىردى. فورۋم اياسىندا «قازاقستان مەن رەسەيدىڭ تاريحي عىلىمى: ىنتىماقتاستىقتىڭ بولاشاعى» تاقىرىبىندا دوڭگەلەك ۇستەل ءوتتى.
ءىس-شارانى ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتى ۇلتتىق تاريحشىلار كونگرەسىمەن بىرلەسىپ، عىلىم جانە جوعارى ءبىلىم مينيسترلىگىنىڭ قولداۋىمەن ۇيىمداستىردى. ەكى ەلدىڭ ساراپشىلارى بىرلەسكەن جوبالاردى تالقىلاپ، سوڭعى جىلدارداعى جۇمىستارىنىڭ ناتيجەلەرىن قورىتىندىلادى.
جيىن بارىسىندا قازاقستان مەن رەسەي مەكتەپتەرىندە وقۋشىلار اراسىندا ۇلى جەڭىس تاقىرىبىنا ارنالعان شىعارمالار بايقاۋىن وتكىزۋ ۇسىنىسى ايتىلدى. شەتەلدىك ساراپشىلاردىڭ ايتۋىنشا، بۇل بايقاۋ ءۇشىن قازاقستان تاراپىمەن دايىندالعان قۇجاتتاما قازىردىڭ وزىندە ءازىر.
"ۇلى جەڭىسكە ارنالعان مەكتەپتىك جۇمىستار بايقاۋىن بىرلەسە وتكىزۋ ۇسىنىلدى. مۇنداي بايقاۋدى ءبىز 2019 جىلى ءساتتى ۇيىمداستىرعان بولاتىنبىز. قازاقستان تاراپىمەن دايىندالعان بايقاۋ قۇجاتتاماسى بار، ءارى زەرتتەۋ تاقىرىپتارى بويىنشا ۇسىنىستار بار. سونداي-اق شەكارالاس قالالاردا ورتاق تاريحقا ارنالعان كونفەرەنتسيالار وتكىزۋ تۋرالى يدەيالار بار. بۇدان بولەك، قازاقستان مەن رەسەي ايماعىنىڭ دامۋىنا ايتارلىقتاي ۇلەس قوسقان بەلگىلى عالىمداردىڭ ءرولىن زەرتتەۋ ۇسىنىلدى", - دەدى تاريحشى ميحايل ليپكين ءوز سوزىندە.
