ەكىباستۇز تۇرعىندارى جىلۋسىز قالدى، دەپ جازادى "ادىرنا" ۇلتتىق پورتالى.
ەكىباستۇز جىلۋ ەلەكتر ورتالىعىنىڭ حابارلاۋىنشا, 27 قاراشادا ساعات 01:20-دا №11 قازاناگرەگات توقتاپ قالعان. ساعات 01:30-دا جەلىلىك سۋدىڭ كوپ شىعىندالۋىنا بايلانىستى №13, 14, 15 قازاندىق اگرەگاتتارى جۇمىس ىستەمەي قالدى.
«قازىرگى ۋاقىتتا №8 جانە №14 قازاناگرەگاتتارى ىسكە قوسىلىپ جاتىر. جوندەۋ بريگادالارى ۇيىمداستىرىلدى. جاقىن ارادا پارامەترلەرى قالپىنا كەلتىرىلەدى. قالا، وبلىس، «پاۆلودارەنەرگو» اق جاعدايدى تۇراقتاندىرۋ ءۇشىن بارلىق قاجەتتى قولداۋ كورسەتىپ جاتىر»، — دەلىنگەن حابارلامادا.
كوممۋنالدىق قىزمەت جاعدايدى ۋشىقتىرماۋ ءۇشىن قالا تۇرعىندارىنان جەلىلىك سۋدى اعىزباۋدى سۇرادى.
«قۇبىرلار تولىعىمەن سالقىنداپ، ءۇي جالپى جىلۋ جۇيەسىنەن اجىراتىلعان جاعدايدا عانا جۇيەدەن جەلىلىك سۋدى اعىزۋ قاجەت»، — دەيدى «ەكىباستۇزجىلۋەنەرگو» وكىلدەرى.
زالال تۋرالى اقپاراتتى +7 701 705 49 57 نومىرىنە ديسپەتچەرلىك What’sApp قىزمەتىنە دەرەۋ جىبەرۋ قاجەت.
«قازىرگى تاڭدا تۇرعىنداردىڭ جىلۋمەن قامتۋ جاعدايىن تۇراقتاندىرۋداعى باستى كومەگى — جىلۋ جەلىلەرىنىڭ زاقىمدانۋى تۋرالى اقپارات. ىسكە قوسىلعاننان كەيىن تۇرعىندارعا جىلۋ قۇبىرلارىن تارتۋ جانە اقاۋلاردى جويۋ بويىنشا كومەك قاجەت بولادى»، — دەدى كوممۋنالدىق قىزمەت وكىلدەرى.
"ادىرنا" ۇلتتىق پورتالى
