قازاقستاندا ەكى ميلليارد اعاش وتىرعىزىلماق

3876
Adyrna.kz Telegram

مەملەكەت باسشىسىنىڭ باستاماسىمەن ەكى ميلليارد اعاش وتىرعىزىلادى. ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ حالىق الدىندا ەسەپ بەرۋ كەزدەسۋىندە وسىلاي دەدى، دەپ حابارلايدى "ادىرنا" ۇلتتىق پورتالى.

وسى ماقساتتا بارلىق ايماقتارعا جانە مينيسترلىكتىڭ ۆەدومستۆولىق باعىنىشتى مەكەمەلەرىندە كەشەندى جوسپارلار بەكىتىلدى. جوسپارلاردا رەسپۋبليكالىق بيۋدجەتتەن دە، جەرگىلىكتى بيۋدجەتتەن دە شىعىندار قاراستىرىلعان. ورمان جانە تابيعاتتى قورعاۋ مەكەمەلەرىنىڭ ءىس-ارەكەتتەرىن ۇيلەستىرەتىن شتاب قۇرىلدى. كوگالداندىرۋ جۇمىستارى باستالىپ كەتتى. قازىردىڭ وزىندە 26,1 مىڭ گەكتار القاپقا 80,5 ميلليون اعاش وتىرعىزىلدى. بۇل شارالار ەلدىڭ ورمان القابىن 2030 جىلعا قاراي 5% -عا جەتكىزۋگە مۇمكىندىك بەرەدى.

"ارال تەڭىزىنىڭ قۇرعاعان تۇبىنە سەكسەۋىل وتىرعىزۋ جەكە ماسەلە بولىپ تابىلادى. 1990 جىلدان 2021 جىلعا دەيىن 195 مىڭ گەكتار القاپقا سەكسەۋىل وتىرعىزىلدى (9%). بىرنەشە اپتا بۇرىن وڭىرگە ەكسپەديتسيا جونەلتىلگەن بولاتىن. قولدانىستاعى ەكپەلەردى قايتا قاراۋ جۇرگىزىلدى. تابيعي شىعۋىن ەسكەرە وتىرىپ، اۋدانى 337 مىڭ گا قۇرادى. مەملەكەت باسشىسىنىڭ تاپسىرماسى بويىنشا ءبىز سەكسەۋىل وتىرعىزۋدىڭ كەشەندى باعدارلاماسىن جاساپ جاتىرمىز. 2021-2030 جىلدارى 1,1 ميلليون گەكتار جەرگە سەكسەۋىل وتىرعىزۋ جوسپارلانىپ وتىر", دەدى مينيستر.

زياندى وتەۋ مولشەرى قىزىل كىتاپقا ەنگىزىلگەن زاڭسىز كەسىلگەن ءار اعاش ءۇشىن 6-دان 1000 اەك-كە دەيىن ۇلعايتىلدى. سونىمەن قاتار، اكىمشىلىك جانە قىلمىستىق كودەكستەرگە ورمان قورىندا جانە قالالار مەن ەلدى مەكەندەر اۋماعىندا اعاشتار مەن بۇتالاردى زاڭسىز كەسكەنى، جويعانى جانە بۇلدىرگەنى ءۇشىن ايىپپۇلداردى كوبەيتۋ جانە بۇزۋشىلارعا سانكتسيانى كۇشەيتۋ تۋرالى تۇزەتۋلەر ەنگىزىلدى. سونداي-اق، وسىمدىكتەر دۇنيەسىن قورعاۋدىڭ، ءوسىمىن مولايتۋدىڭ جانە پايدالانۋدىڭ بارلىق ماسەلەلەرىن زاڭنامالىق تۇرعىدان وڭتايلاندىرۋ ماقساتىندا ماجىلىستە قارالىپ جاتقان «وسىمدىكتەر دۇنيەسى تۋرالى» زاڭ جوباسى ازىرلەندى.

"ادىرنا" ۇلتتىق پورتالى

پىكىرلەر