مەملەكەت باسشىسى قاسىم-جومارت توقاەۆ اقوردادا فرانتسيا پرەزيدەنتى ەممانۋەل ماكروندى قارسى الدى، - دەپ حابارلايدى "ادىرنا" ءتىلشىسى.
فرانتسيا باسشىسى قاسىم-جومارت توقاەۆپەن كەزدەسۋ ءۇشىن اقورداعا كەلدى. ول قازاقستاندا رەسمي ساپارمەن ءجۇر.
ءداستۇر بويىنشا رەزيدەنتسياعا ەكى ەلدىڭ مينيسترلەر كابينەتىنىڭ مۇشەلەرى جينالدى. قاسىم-جومارت توقاەۆتىڭ كەلۋىمەن سالتاناتتى ءراسىمنىڭ رەسمي ءبولىمى باستالدى.
سالتاناتتى شارانىڭ باسىندا قۇرمەتتى قاراۋىل باستىعى ەل باسشىلارىنا راپورت بەردى، ودان كەيىن قازاقستان مەن فرانتسيانىڭ ءانۇراندارى شىرقالدى.
پرەزيدەنتتەر كۇلىمدەپ قول الىسىپ امانداسىپ، كەزدەسۋدى شەكتەۋلى قۇرامدا جالعاستىردى.
ايتا كەتەيىك، بۇل قاسىم-جومارت توقاەۆتىڭ شاقىرۋىمەن فرانتسيا پرەزيدەنتى ەممانۋەل ماكروننىڭ جاۋاپ ساپارى. ەستەرىڭىزگە سالا كەتەيىك، قازاقستان پرەزيدەنتى وتكەن جىلدىڭ قاراشا ايىندا پاريجگە بارىپ، ماكرونمەن كەلىسسوزدەر جۇرگىزگەن بولاتىن.
