وڭىردە ايتىس ونەرىن دامىتۋ جانە جاس ورىنداۋشىلاردى قولداۋ باعىتىنداعى جۇمىستار جالعاسۋدا. بيىل وبلىستا رەسپۋبليكالىق جانە وبلىستىق دەڭگەيدەگى جەتى ايتىس وتكىزۋ جوسپارلانعان. اقمولالىق اقىندار بۇعان دەيىن دە ءىرى حالىقارالىق دودالاردا ءوز ونەرلەرىن كورسەتىپ، ءوڭىر نامىسىن ابىرويمەن قورعاپ كەلەدى. ۇلتتىق ونەردى دامىتۋ جانە ۇرپاقتار ساباقتاستىعى تۋرالى بريفينگكە قاتىسۋشىلار ايتىپ بەردى.
اقمولا وبلىسىنىڭ مادەنيەت باسقارماسىنىڭ باسشىسى نۇرعيسا داۋەشوۆتىڭ ايتۋىنشا، بيىل وڭىردەن رەسپۋبليكالىق جوسپارعا جەتى ايتىس ەنگىزىلگەن. ونىڭ ۇشەۋى – رەسپۋبليكالىق، تورتەۋى – وبلىستىق دەڭگەيدەگى دودالار. جىل باسىنان بەرى ءۇش ءىرى ايتىس ۇيىمداستىرىلدى.
ولاردىڭ قاتارىندا ابىلاي حاننىڭ 315 جىلدىعىنا ارنالعان «ساڭلاقتار تۋعان سارى بەل» وبلىستىق ايتىسى، جامبىل جاباەۆتىڭ 180 جىلدىعىنا وراي ۇيىمداستىرىلعان «بالا اقىن – جاس دارىن» وڭىرلىك مەكتەپ وقۋشىلارىنىڭ ايتىسى جانە رەسپۋبليكالىق كوماندالىق «بەس اسىل» مەگاجوباسى بار.
نۇرعيسا داۋەشوۆ «بەس اسىل» جوباسىنا دا جەكە توقتالدى. بۇل جوبا وبلىستا العاش رەت 1 مامىردا وتكىزىلدى. بايقاۋعا اقمولا جانە اتىراۋ وبلىستارىنىڭ كوماندالارى قاتىسىپ، ۇلتتىق ونەردىڭ بىرنەشە باعىتى بويىنشا ءوز شەبەرلىكتەرىن ورتاعا سالدى. اقمولالىق كوماندا جوعارى ناتيجە كورسەتىپ، ەكىنشى كەزەڭگە جولداما الدى.
ء«بىز ءۇشىن ۇلتتىق ونەردىڭ تەك تاريحتىڭ ءبىر بولىگى بولىپ قالماعانى ماڭىزدى. جاس ورىنداۋشىلاردىڭ شەبەرلىگىن شىڭداپ، ءىرى دودالارعا قاتىسىپ، رەسپۋبليكالىق جانە حالىقارالىق دەڭگەيدە اقمولا وبلىسىنىڭ اتىنان ونەر كورسەتۋىنە جاعداي جاساۋىمىز قاجەت. سوندىقتان ايتىس ونەرى مەن جاس اقىنداردى قولداۋ جۇمىسىمىزدىڭ ماڭىزدى باعىتتارىنىڭ ءبىرى بولىپ قالا بەرەدى»، – دەدى نۇرعيسا داۋەشوۆ.
مۇنداي قولداۋدىڭ ناقتى مىسالدارىنىڭ ءبىرى – ەرەيمەنتاۋ وڭىرىنەن شىققان جاس اقىن ساتتىبەك سەرىكبولاتۇلىنىڭ جەتىستىگى. جۋىردا ول موڭعوليانىڭ قوبدا ايماعىندا وتكەن حالىقارالىق اقىندار ايتىسىندا گران-پري يەلەندى. حالىقارالىق دوداعا قازاقستان، قىتاي جانە موڭعوليادان كەلگەن اقىندار قاتىستى.
ساتتىبەك سەرىكبولاتۇلىنىڭ ايتۋىنشا، حالىقارالىق بايقاۋداعى جەڭىس ول ءۇشىن ماڭىزدى بەلەس بولعانىمەن، ول مۇنىمەن توقتاپ قالماق ەمەس.
«مەن ءۇشىن ايتىس – ەڭ الدىمەن، مەنى ۇيرەتىپ، قولداۋ كورسەتىپ جۇرگەن جاندار الدىنداعى ۇلكەن جاۋاپكەرشىلىك. ساحناعا شىققاندا ءوزىڭدى عانا ەمەس، ءوز ءوڭىرىڭدى، ۇستازدارىڭدى دا تانىستىراسىڭ. موڭعولياداعى جەڭىس ماعان ودان ءارى ءوزىمدى جەتىلدىرىپ، وسىنداي ۇلكەن ساحنالاردا لايىقتى ونەر كورسەتۋگە دەگەن سەنىم مەن ىنتانى ارتتىردى»، – دەدى ساتتىبەك سەرىكبولاتۇلى.
جاس اقىنداردىڭ جەتىستىگىنىڭ ارتىندا ۇستازدىق ءداستۇر مەن تالىمگەرلىك مەكتەبى دە بار. بۇگىندە ساتتىبەك سەرىكبولاتۇلى ايتىس ونەرىنىڭ قىر-سىرىن ەرلان داۋلەتتىڭ جەتەكشىلىگىمەن مەڭگەرىپ ءجۇر. ال ەرلان داۋلەت – اقىن-جازۋشى، قازاقستان جازۋشىلار وداعىنىڭ مۇشەسى، اقمولا وبلىستىق تاريحي-ولكەتانۋ مۋزەيىنىڭ ديرەكتورى مىرزابەك قۇدايبەرلىنىڭ شاكىرتى.
مىرزابەك قۇدايبەرلى ءوز كەزەگىندە قازاقستاننىڭ حالىق اقىنى، اقىندار مەن جىرشىلار قوعامىنىڭ تۇڭعىش پرەزيدەنتى كوكەن شاكەيۇلىنىڭ شاكىرتى. بۇگىندە ول ءوز بىلگەنىن جاس ورىنداۋشىلارعا ۇيرەتىپ كەلەدى. ونىڭ شاكىرتتەرى قاتارىندا ارمان بەردالين، الىبەك سەرعاليەۆ، قۋانىش وسپانوۆ، ەرلان داۋلەت جانە باسقا دا اقىندار بار.
«ايتىستا ساباقتاستىقتىڭ ماڭىزى زور. ادامعا تەك ۇيقاس قۇرۋدى نەمەسە شەشەن سويلەۋدى ۇيرەتۋ جەتكىلىكسىز. وعان سوزگە، تاريحقا، حالىققا دەگەن كوزقاراستى جەتكىزۋ كەرەك. ۇستازدارىم ماعان وسى تاجىريبەنى بەردى، ەندىگى مىندەتىم – ونى شاكىرتتەرىمە جەتكىزۋ. بۇگىندە ساتتىبەك حالىقارالىق ساحناعا شىعىپ، جەڭىسكە جەتىپ جاتسا، بۇل ساباقتاستىقتىڭ جالعاسىپ كەلە جاتقانىن كورسەتەدى»، – دەدى مىرزابەك قۇدايبەرلى.
بۇگىندە ايتىس ونەرىنە جاڭا بۋىن وكىلدەرى كەلىپ جاتىر. جاس اقىندار ءۇشىن بۇل – ءوز تالانتىن تانىتىپ قانا قويماي، عاسىرلار بويى حالىقتىڭ ءومىرىن، قۇندىلىقتارىن، قۋانىشى مەن ماسەلەلەرىن ءسوز ەتۋگە مۇمكىندىك بەرگەن ءداستۇردى جالعاستىرۋدىڭ جولى.
ايتىس يۋنەسكو-نىڭ ماتەريالدىق ەمەس مادەني مۇرالار تىزىمىنە ەنگىزىلگەن. اقمولا وبلىسىندا ونىڭ دامۋى ءىرى دودالار وتكىزۋدەن باستاپ، مەكتەپ وقۋشىلارى مەن جاس اقىنداردى قولداۋعا دەيىنگى بىرنەشە باعىت بويىنشا جۇزەگە اسىرىلۋدا. ال ساتتىبەك سەرىكبولاتۇلىنىڭ موڭعولياداعى جەڭىسى جاس بۋىنمەن جۇرگىزىلىپ جاتقان جۇمىستىڭ ناتيجەسى ءوڭىر شەكاراسىنان تىس جەرلەردە دە كورىنىس تاۋىپ وتىرعانىن كورسەتەدى.
