وبلىستا مەملەكەت باسشىسىنىڭ باستاماسىمەن جۇزەگە اسىرىلىپ جاتقان «ادال ازامات» باعدارلاماسى اياسىندا اعا بۋىن وكىلدەرى مەكتەپ وقۋشىلارى مەن ستۋدەنتتەرگە ۇلتتىق قۇندىلىقتاردى دارىپتەپ، ازاماتتىق جاۋاپكەرشىلىكتىڭ ماڭىزىن تۇسىندىرۋدە. جاڭا وقۋ جىلى باستالعالى ءوڭىردىڭ بىرقاتار ءبىلىم بەرۋ ۇيىمىندا بەيبىتشىلىك پەن كەلىسىم، مەدياتسيا، ادامگەرشىلىك جانە ادالدىق تاقىرىپتارىنا ارنالعان كەزدەسۋلەر ءوتتى. بۇل جۇمىسقا اقساقالدار كەڭەستەرىنىڭ مۇشەلەرى دە بەلسەندى قاتىسىپ كەلەدى.
«ادال ازامات» باعدارلاماسى وسكەلەڭ ۇرپاقتىڭ بويىندا ۇلتتىق جانە جالپىادامزاتتىق قۇندىلىقتاردى قالىپتاستىرۋعا باعىتتالعان. مەملەكەت باسشىسى قاسىم-جومارت توقاەۆ 2025 جىلعى ۇلتتىق قۇرىلتايدىڭ IV وتىرىسىندا ء«بىرتۇتاس تاربيە» باعدارلاماسىن «ادال ازامات» دەپ اتاۋدى قولدادى. باعدارلامانىڭ نەگىزگى ماقساتى – وتانشىل، ءبىلىمدى، ەڭبەكقور ءارى قوعام الدىنداعى جاۋاپكەرشىلىگىن سەزىنەتىن ازامات تاربيەلەۋ.
«اقمولا وبلىسىندا وسى باعىتتاعى جۇمىستى جۇيەلەۋ ماقساتىندا اعىمداعى جىلدىڭ باسىندا «ادال ازامات» جوباسىن جۇزەگە اسىرۋ ماسەلەلەرىنە ارنالعان اقساقالدار كەڭەسىنىڭ وتىرىسى ءوتتى. وعان كەڭەس مۇشەلەرى مەن ءبىلىم بەرۋ بولىمدەرىنىڭ باسشىلارى قاتىستى. جيىندا اقساقالداردى مەكتەپتەرگە بەكىتۋ جانە وقۋشىلار اراسىندا تاربيەلىك جۇمىستار جۇرگىزۋ ماسەلەلەرى قاراستىرىلدى» ، دەدى وبلىستىق اقساقالدار كەڭەسىنىڭ توراعاسى ەرمەك نۇعىمانوۆ.
قازىر اقساقالدار كەڭەسىنىڭ مۇشەلەرى مەكتەپ وقۋشىلارى مەن كوللەدج ستۋدەنتتەرىمەن كەزدەسۋلەر، دارىستەر جانە اشىق اڭگىمەلەر وتكىزىپ كەلەدى. ءىس-شارالاردا ادالدىق، وتانسۇيگىشتىك، ەڭبەكقورلىق، ادامگەرشىلىك، بىلىمگە قۇشتارلىق، ۇلكەنگە قۇرمەت پەن قوعامدىق كەلىسىم قۇندىلىقتارى دارىپتەلەدى.
وقۋ جىلى باستالعالى وڭىردەگى ءبىلىم بەرۋ ۇيىمدارىندا باعدارلامانىڭ نەگىزگى قۇندىلىقتارىن تۇسىندىرۋگە ارنالعان بىرقاتار ءىس-شارا ۇيىمداستىرىلدى.
ماسەلەن 10 قىركۇيەكتە كوكشەتاۋ قالاسىنداعى №5 «تاڭداۋ» مەكتەپ-گيمنازياسىندا اقساقالدار كەڭەسىنىڭ مۇشەسى كوشەك سامەنوۆتىڭ قاتىسۋىمەن «بەيبىتشىلىك پەن كەلىسىم ساباعى» ءوتتى. كەزدەسۋدە قوعامدىق كەلىسىم مەن ءوزارا قۇرمەتتىڭ ماڭىزىن جاس ۇرپاققا جەتكىزۋگە باسىمدىق بەرىلدى.
كوكشەتاۋ جوعارى مەديتسينالىق كوللەدجىندە دە وسى سىندى كەزدەسۋ ءوتتى. بولات زاكەنوۆپەن «مەدياتسيا – تاتۋلاسۋ ونەرى جانە جاستار تاربيەسى» تاقىرىبىندا كەزدەسۋ ۇيىمداستىرىلدى. سول كۇنى شوقان ءۋاليحانوۆ اتىنداعى كوپسالالى كوللەدجدە مۇرات قاجى ىدىرىسۇلى ستۋدەنتتەرمەن جۇزدەسىپ، «اتانىڭ ءسوزى – اقىلدىڭ كوزى» اتتى كەزدەسۋدە ومىرلىك تاجىريبەسىمەن ءبولىستى.
الداعى ۋاقىتتا دا ءبىلىم بەرۋ ۇيىمدارىندا كەزدەسۋلەر وتكىزۋ جوسپارلانعان. اتاپ ايتقاندا، كوشەك سامەنوۆتىڭ №5 مەكتەپتە، شياپ شاراپۇلى اليەۆتىڭ №1 مەكتەپتە، داحان شوكشىرۇلى ءجامشيننىڭ №18 مەكتەپتە، بايكەنۇلى قاراتايدىڭ ءال-فارابي اتىنداعى مەكتەپ-ليتسەيىندە كەزدەسۋلەرى كوزدەلگەن.
جوبانى اقمولا وبلىسىنىڭ بارلىق اۋدانىندا جۇزەگە اسىرۋ جوسپارلانىپ وتىر. اقساقالدار كەڭەستەرىنىڭ قاتىسۋىمەن جۇرگىزىلىپ جاتقان جۇمىس جاستاردى ۇلتتىق قۇندىلىقتاردى قۇرمەتتەۋگە، ادال ەڭبەك ەتۋگە، ەلجاندىلىققا جانە ءوز ىسىنە جاۋاپكەرشىلىكپەن قاراۋعا تاربيەلەۋگە باعىتتالعان.
