ماسقارا، تەلەارنادان ءوزى بلوگەر، ءوزى قۇرىلىسشى، ءوزى كوۋچ، ءوزى اقىن، ءوزى پسيحولوگ، ءوزى سازگەر، ءوزى تامادا ءارى تاكسيست ادام سويلەپ وتىر… ويلاپ قويام، ءبىر ادامعا وسىنشاما كاسىپ ءھام ماماندىق از ەمەس پە دەپ…
سوسىن 2005 جىل ما ەدى، 2007 جىل ما ەدى، بىلمەدىم، رەداكتسيامىزعا ۇلكەن مەمورگاننان داريعا اپامىزدىڭ ءومىربايانى جازىلعان پرەسس-رەليز كەلگەنى ەسىمە ءتۇستى. جاڭاعى اق قاعازدىڭ ءبىر بەتى تەك كاسىپتەر مەن عىلىمي دارەجەلەرگە تولعان عوي… سول جىلدارى بيلىكتەن باستالعان بىزشە ايتقاندا، “8 قىرلى، 1 سىرلى”، ەۋروپاشا ايتقاندا، “فيگارو اندا، فيگارو مىندا” ىندەتى قارا حالىققا دا جۇققان سياقتى.
ويلاپ قويام، ولاردان مەنىڭ نەم كەم؟
ماسەلەن، مەن تۇرمىسقا شىققان 14 جىل ىشىندە وتباسىلىق پسيحولوگ بوپ كەتتىم. اپالارىم “جەزدەڭ جۇمىس ىستەمەي ءجۇر” دەسە، “قارتايعان شىعار” دەيسىڭ عوي، جەزدەڭ “سامووتسەنكاسىن” كوتەرۋ ءۇشىن ەرتەسىنە ەسكى كولىگىمەن تاكسيلەتىپ كەتەدى عوي. بالالى بولعان 13 جىل ىشىندە پەدياتر دارىگەر بوپ الدىم. ءتىپتى، ءبىر جاسار بالام اۋىرسا، مۇرنىنداعى ماڭقاسىن اسپيراتورمەن ءبىر تامشى قالمايتىنداي ەتىپ تازالاپ تاستايمىن عوي. نەگە مەن لورمىن دەمەيمىن؟ كەيدە بالاباقشادان جاتتاۋعا دەپ، شاتپاق ولەڭدەر كەلەدى. “مىناۋ دا ولەڭ بوپ پا؟” دەپ ولەڭدى رەداكتسيالاپ، دۇرىستاۋ نۇسقاسىن جاتتاتقىزىپ جىبەرەمىز عوي. ءبىز نەگە اقىندىعىمىزدى ايتپايمىز؟
رەداكتسياعا مەمورگانداردان تالاي قاتە پرەسس-رەليز كەلدى، سولاردى دۇرىستاپ، فاكت-چەك جاساپ، قاتەسىن تۇزەپ، گازەتكە بەرەتىنبىز. ال ءبىزدىڭ كوررەكتورلىق ءھام فاكت-چەك قىزمەتىمىزگە نەگە اقى تولەنبەگەن؟ اعىلشىنشا، ورىسشا العان سۇحباتتاردى قازاقشالايتىن ەدىك، ءبىز نەگە اۋدارماشىمىز دەمەيمىز؟ جاستاۋ كەزىمىزدە ءيتىمىز اۋىرسا، “بۇعان سۋىق ءتيدى-اۋ” دەپ ۋايىمداپ، يتكە جىلى سورپا، سۇتپەن شاي بەرىپ ءبىر كۇندە جازىپ جىبەرۋشى ەدىك قوي. سۇتپەن شاي زيان دەيتىندەرگە دۇعاي سالەم! ءيتىمىز باقىتتى دا ۇزاق ءومىر ءسۇردى. ءبىز نەگە ۆەتەرينار ەكەنىمىزدى ايتپايمىز؟ بىرەۋمەن سۇحباتتاسۋعا بارساق، ء“سىز جايلى ادام ەكەنسىز، ىشكى سىرىمىزدى بۇكپەي ايتامىز عوي” دەپ سۇحبات بەرۋشى دە بار شىندىعىن جايىپ سالادى عوي، ونى سارى باسىلىمدارداي ەش جەردە جاريالاماي، قايتا جاقسى سوزبەن قولداساڭ، ءبىر كۇنى جاڭاعى ادامنىڭ سەنىڭ يدەياڭمەن ءبىر جوبانى جۇزەگە اسىرعانىن ەستىسەڭ، يوۋ، مەن كوۋچ ەكەنمىن عوي دەمەيمىز، ءا؟!
باياعىدا بىرەۋگە “بيتكوينعا نەمقۇرايلى قاراماڭدار، ول دا ءوسۋى مۇمكىن” دەگەم، مەن قارجى اناليتيگى ەمەسپىن بە وسى؟
داۋسىم بولسا، تويعا دا ءان ايتىپ شىعار ەدىم… بىراق قازىر كىمدە داۋىس بار؟! مەندە تىم بولماسا ءتۇر بار عوي… ايتپەسە تويدا ءتۇرى دە، داۋىسى دا جوقتار دۇرىلدەپ ءجۇر عوي… ەندى ءبىر اۆتورلىق ءان شىعارىپ، سازگەرلىگىمدى كورسەتسەم بە ەكەن…
قازىر قازاقستاندا كۆن-شىلار مەن تامادالار، انشىلەر مەن بلوگەرلەر مۇرنىن سۇقپاعان ماماندىق قالمادى عوي. مۇمكىن ءار نارسەگە شاشىلماي، اركىم ءوز ىسىمەن اينالىسسا، دامىپ كەتەر مە ەكەنبىز؟
يتاليادا فيگارو جالعىز بولعان، ال ءبىزدىڭ ەلدە فيگارولار تىم كوپ ەمەس پە؟
ءتىپتى، زاڭ شىعارۋشى ورگان - پارلامەنتتە وتىرعاندارى بار عوي… يدەولوگيا قۇرالى كينودان كوبىرەك اقشا تابۋعا تىرىسىپ جاتقاندارى قانشاما؟ قاشان ەلىمىزدە ون كاسىپتىڭ ەمەس، ءبىر كاسىپتىڭ مامانى باعالانادى ەكەن وسى؟ كەيدە ءبىر اداممەن تانىسقاندا، جاي ءجۋرناليستپىن دەۋگە ۇيالادى ەكەنسىڭ…
بولماسا “بۇحار جىراۋمەن داستارحانداس بولعان، قاجىمۇقانمەن بەلدەسكەن” دەيتىندەي، اتاق-دارەجە بىزدە دە بار. تەك ۇيالادى ەكەنسىڭ، تانىسىپ تۇرىپ “تۇركيا پرەزيدەنتى ابدوللا گۇلدىڭ قولىنان شاي ىشكەم، ماسانوۆپەن ءتىل توڭىرەگىندە سالعىلاسقام، تاسماعامبەتوۆكە اكىم تۇسىندا ايتىپ-ايتىپ تاستاعام” دەۋگە…
Kamshat Tasbolat
