بۇگىن، 25 قاراشادا پرەزيدەنت قاسىم-جومارت توقاەۆ 3 بىردەي ءمينيستردى قابىلدادى. اتاپ ايتساق، مەملەكەت باسشىسىنا قورعانىس ءمينيسترى رۋسلان جاقسىلىقوۆ، ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا جانە ىشكى ىستەر ءمينيسترى ەرجان سادەنوۆ ەسەپ بەردى، دەپ حابارلايدى «ادىرنا» ءتىلشىسى.
سۆەتلانا جاقىپوۆا ەلىمىزدەگى الەۋمەت جانە ەڭبەك سالالارىن دامىتۋ بويىنشا اتقارىلىپ جاتقان جۇمىستارعا توقتالدى. ايتۋىنشا، 2025 جىلدىڭ 1 قاڭتارىنان باستاپ ارناۋلى الەۋمەتتىك قىزمەت كورسەتۋ ورتالىقتارىندا جان باسىنا شاققانداعى قارجىلاندىرۋدى ليتسەنزيالاۋ جۇيەسى ەنگىزىلەدى. بۇل ماقساتتا كاسىبي ستاندارتتار مەن وقىتۋ مودۋلدەرى ازىرلەنگەن. 2030 جىلعا دەيىنگى ينكليۋزيۆتى ساياسات تۇجىرىمداماسى اياسىندا مۇگەدەكتىكتىڭ الەۋمەتتىك-قۇقىقتىق قورعاۋ مودەلىنە كوشۋ ەنگىزىلىپ جاتىر.
ال ىشكى ىستەر ءمينيسترى ەرجان سادەنوۆ ەلىمىزدەگى كريمينوگەندىك جاعداي تۋرالى ايتتى. ول جىل باسىنان بەرى قىلمىستىڭ تومەندەۋى بايقالاتىنىن مالىمدەدى. ءمينيستردىڭ مالىمەتىنشە، قىلمىستىق قۇقىقبۇزۋشىلىق – 5,5 مىڭعا، قىلمىس 10 مىڭعا ازايعان. سونداي-اق سادەنوۆ قازاقستاندا «زاڭ مەن ءتارتىپ» قاعيداتىن ىسكە اسىرۋ، قۇقىقبۇزۋشىلىققا «مۇلدەم توزبەۋشىلىك» جانە ونىڭ الدىن الۋ شارالارى تۋرالى حابارلادى.
كەزدەسۋ سوڭىندا قاسىم-جومارت توقاەۆ ەلىمىزدەگى قۇقىقتىق ءتارتىپ پەن قوعامدىق قاۋىپسىزدىك دەڭگەيىن ودان ءارى ارتتىرۋ بويىنشا بىرقاتار تاپسىرما بەردى.
بۇعان دەيىن پرەزيدەنتتىڭ ۇقشۇ ءسامميتى الدىندا قورعانىس ءمينيسترىن قابىلداعانىن جازعان ەدىك.
