ۋكرايناداعى سوعىس قيمىلدارىنىڭ ورشۋىنە بايلانىستى جاعدايعا قر سىرتقى ىستەر مينيسترلىگى پىكىر ءبىلدىردى، دەپ حابارلايدى "ادىرنا" ۇلتتىق پورتالى.
رەسمي وكىل ايبەك سمادياروۆ ۋكرايناداعى جاعدايعا قاتىستى قازاقستاندىقتاردان ەۆاكۋاتسيالاۋ تۋرال ءوتىنىش بولماعانىن مالىمدەدى.
«ۋكرايناداعى ەلشىلىگىمىز قالىپتى رەجيمدە جۇمىس ىستەۋدە. سىرتقى ىستەر مينيسترلىگىندە وقيعا بارىسىن باقىلايتىن احۋال ورتالىعى بار. بىزدەگى دەرەكتەرگە قاراعاندا، شەتەلدىك ديپلوماتيالىق كورپۋس تا كيەۆتەگى جۇمىسىن جالعاستىرىپ، ازىرگە ءوز ازاماتتارىن ەۆاكۋاتسيالامايدى. قازاقستاندىقتاردان ەۆاكۋاتسيالاۋ تۋرالى ءوتىنىش تۇسكەن جوق جانە قازىرگى كەزەڭدە ارنايى رەيستەر دە جوسپارلانباعان»، - دەپ مالىمدەدى سمادياروۆ.
سىرتقى ىستەر مينيسترلىگى رەسمي وكىلىنىڭ مالىمەتىنشە، ۋكراينا اۋماعىندا 300-گە جۋىق قازاقستان ازاماتى بولۋى مۇمكىن.
«ەلدەگى جاعدايعا بايلانىستى ناقتى ساندى اتاۋ قيىن» دەلىنگەن تۇسىنىكتەمەدە.
ايبەك سمادياروۆ ءبىر-ەكى كۇن بۇرىن قازاقستان بيلىگى اتقىلاۋ جيىلىگىنىڭ ارتۋىنا بايلانىستى قازاقستان رەسپۋبليكاسى ازاماتتارىن ۋكراينادان كەتۋگە شاقىرعان ەدى.
«قازاقستاندىق ديپلوماتتار وتانداستار ءوتىنىش بەرگەن كەزدە بارلىق قاجەتتى كومەكتى كورسەتەدى. قالاي بولعاندا دا، ءبىز جاعدايدىڭ قالاي ورشيتىنىنە قارايمىز»، - دەدى ايبەك سمادياروۆ.
سىرتقى ىستەر مينيسترلىگىنىڭ وكىلى جولداعان ۇسىنىستا قازاقستاندىقتار مولدوۆا نەمەسە پولشا ارقىلى ۋكراينادان كەتە الاتىنى ايتىلعان.
سوڭعى بىرنەشە كۇندە ۋكرايناداعى جاعداي كۇرت ۋشىعىپ كەتكەن ەدى. بىرنەشە ايلىق پوزيتسيالىق قاقتىعىستاردان كەيىن سوعىسۋشى تاراپتار بەلسەندى زىمىراندىق شابۋىلدارعا كوشتى. جەكسەنبى كۇنى رەسەي ەڭ ۇلكەن باسقىنشىلىق شابۋىلدارىنىڭ ءبىرىن جاسادى.
وسىدان كەيىن اقش-تان رۇقسات العان ۋكراينا ATACMS جانە Storm Shadow زىمىراندارىمەن رەسەي اۋماعىنا شابۋىل جاسادى. ءبىر كۇن بۇرىن رەسەي تاعى دا دنەپرگە بالليستيكالىق زىمىران ۇشىردى.
