قازاقستان ازاتتىق راديوسىنىڭ 36 تىلشىسىنە اككرەديتاتسيا بەرمەي جاتىر، دەپ حابارلايدى "ادىرنا" ءتىلشىسى.
قازاقستاننىڭ سىرتقى ىستەر مينيسترلىگى ازاتتىق راديوسىنىڭ تىلشىلەرىنە اككرەديتاتسيا بەرمەيتىنىن مالىمدەگەن. بۇل تۋرالى ازاتتىق سايتى جاريالادى.
ەلدىڭ سىرتقى ىستەر مينيسترلىگى شەتەل اقپارات قۇرالىنىڭ تىلشىسىنە اككرەديتاتسيا بەرۋ نەمەسە بەرمەۋ تۋرالى شەشىمدى ءوتىنىش تۇسكەن كۇننەن باستاپ ەكى اي ىشىندە قابىلداۋى كەرەك. اككرەديتاتسيا بەرىلمەگەن جاعدايدا مينيسترلىگىن شەشىمىن نەگىزدەۋى دە قاجەت.
ال ازاتتىق رەداكتسياسى ءتيىستى قۇجاتتاردى ءبىر ەمەس، بىرنەشە رەت جانە ۋاقىتىلى تاپسىرعان. دەگەنمەن مينيسترلىكتەن اككرەديتاتسيا الا الماعانىن ايتادى.
قازاقستان سىرتقى ىستەر مينيسترلىگى ازاتتىقتىڭ 36 تىلشىسىنە اككرەديتاتسيا بەرمەي قويعان. اككرەديتاتسيالانباعان قىزمەتكەرلەر قاتارىندا 2022 جىلدان بەرى رۇقساتى سوزىلماعان جۋرناليستەر بار. وسىعان قاتىستى ازاتتىق رەداكتسياسى ءوز مۇددەسىن سوتتا قورعايتىنىن حابارلادى.
ودان بولەك، قازاقستاندا اككرەديتاتسياسى جوق شەتەل باق-تىڭ جۇمىسىنا تىيىم سالۋ ۇسىنىلدى. ۇكىمەتتىڭ ماسس-مەديا تۋرالى جاڭا زاڭ جوباسىنا شەتەل اقپارات قۇرالدارى مەن جۋرناليستەرىن اككرەديتاتسيالاۋ ەرەجەسىنە قاتىستى تۇزەتۋلەر ەنگىزىلمەك.
دەپۋتاتتار ۇسىنىپ وتىرعان وزگەرتۋلەر سىرتقى ىستەر مينيسترلىگىنە "قازاقستاننىڭ ۇلتتىق قاۋىپسىزدىگىنە قاتەر تونگەن جاعدايدا" شەتەلدىك باق جۋرناليستەرىنە اككرەديتاتسيا بەرمەۋ قۇقىعىن بەرەدى. ال اككرەديتاتسيا الماعان شەتەل اقپارات قۇرالدارى مەن شەتەل جۋرناليستەرىنە كاسىبي جۋرناليستيكامەن اينالىسۋىنا تىيىم سالۋدى قاراستىرماق.
