گەرمانيادا ءىز-ءتۇسسىز جوعالىپ كەتكەن قازاقستاندىق ايەل ءولى كۇيىندە تابىلدى. بۇل تۋرالى سىرتقى ىستەر مينيسترلىگى مالىمدەدى، دەپ حابارلايدى “ادىرنا” ۇلتتىق پورتالى.
قازاقستاننىڭ سىرتقى ىستەر مينيسترلىگى 16 ماۋسىمدا گەرمانيانىڭ بەنسحايم قالاسىنىڭ ماڭىندا ايەلدىڭ ءمايىتى تابىلعانىن حابارلادى. سوت ساراپشىلارى ساراپتاما جۇرگىزەدى. پوليتسەيلەردىڭ اۋىزشا الدىن الا مالىمەتى مەن ءمايىتتىڭ سىرتقى بەلگىلەرى بويىنشا تابىلعان دەنە ايگۇل سايلىباەۆاعا تيەسىلى.
«قازىرگى ۋاقىتتا مارقۇمنىڭ تۋىستارى گەرمانيادا جانە ولارعا بارلىق قاجەتتى كونسۋلدىق-قۇقىقتىق كومەك كورسەتىلۋدە. گەرمانيانىڭ قۇقىق قورعاۋ ورگاندارى تەرگەۋ جۇرگىزىپ جاتىر. بۇل ىسكە قاتىستى باسقا اقپارات تەرگەۋ مۇددەسى ءۇشىن جاريالانبايدى»، - دەلىنگەن ءسىم حابارلاماسىندا.
ايتا كەتەيىك، ايگۇل سايلىباەۆا – بۇرىن استانا قالاسى سارىارقا اۋدانىنىڭ سۋدياسى بولىپ قىزمەت ەتكەن، سونداي-اق ول «بولاشاق» باعدارلاماسىنىڭ تۇلەگى.
1984 جىلى تۋعان قازاقستان ازاماتى 2019 جىلدان بەرى كۇيەۋى الەكساندرمەن بىرگە فرانكفۋرتتەن 40 شاقىرىم جەردەگى بەنسحايم قالاسىندا تۇرىپ جاتقان. تۋىستارى ايگۇلدىڭ وتباسىنان ءجابىر كورىپ جۇرگەنى جايلى ءتىس جارماعانىن، تەك دوستارىنا عانا بايانداعانىن ايتادى. ولار 5 ماۋسىمدا فرانكفۋرت قالاسىنداعى قازاقستاننىڭ باس كونسۋلدىعىنا 2024 جىلعى 3 ماۋسىمدا قىزىنىڭ جوعالىپ كەتكەنىن ايتىپ ارىز تۇسىرگەن.
