بۇگىن «قۇقىق بۇزۋشىلىقتىڭ الدىن الۋ ماسەلەسى» تاقىرىبىندا م.اۋەزوۆ اتىنداعى وقۋ-دا ارنايى كەزدەسۋ ۇيىمداستىرىلدى. ءىس-شاراعا قۇقىق قورعاۋ ورگاندارىنىڭ وكىلدەرى، وقۋ ورنىنىڭ وقىتۋشىلارى مەن ستۋدەنتتەرى قاتىستى. جاستارمەن كەزدەسۋ قازاقستان رەسپۋبليكاسىنىڭ باس پروكۋراتۋراسىنىڭ تاپسىرماسى اياسىندا كوپشىلىكتىڭ قۇقىقتىق ساۋاتتىلىعىن ارتتىرۋ، قۇقىقتىق ساناسىن جوعارىلاتۋ ماقساتىندا قالالىق پروكۋراتۋرا، قالالىق ىشكى ساياسات جانە جاستار ىستەرى جونىندەگى باسقارماسى، قالالىق جاستار ورتالىعىنىڭ بىرلەسۋىمەن ءوتتى.
كەزدەسۋ بارىسىندا قۇقىقتىق مادەنيەتتى قالىپتاستىرۋ، زاڭ بۇزۋشىلىقتارعا جول بەرمەۋ جانە جاستار اراسىنداعى قۇقىق بۇزۋشىلىق دەڭگەيىن تومەندەتۋ ماسەلەلەرى تالقىلاندى. سپيكەرلەر ستۋدەنتتەرگە قۇقىقتىق جاۋاپكەرشىلىك تۋرالى تولىق اقپارات بەرىپ، قۇقىق بۇزۋشىلىقتىڭ سالدارى تۋرالى ناقتى مىسالدار كەلتىردى.
ۋنيۆەرسيتەتتىڭ اكادەميالىق ماسەلەلەر جونىندەگى پرورەكتورى قۇرمانعالي سارىقۇلوۆ جۇزدەسۋدىڭ ماڭىزدىلىعىنا توقتالدى. سونداي-اق، قر پروكۋراتۋراسىنىڭ قۇرمەتتى قىزمەتكەرى، اعا ادىلەت كەڭەسشىسى ءابدىرامان اققۇلوۆ «قوعامداعى قۇقىق بۇزۋشىلىقتىڭ الدىن الۋ ماسەلەلەرى» بايانداماسىندا جاس بۋىندى ەلىكتەۋدەن ساقتانۋعا شاقىرىپ، سوت ىسىندەگى جاعدايلاردان مىسالدار كەلتىردى.
شىمكەنت قالاسى پروكۋرورىنىڭ اعا كومەكشىسى قايسار قالداباەۆ ءوز سوزىندە جاستار اراسىندا قۇقىق بۇزۋشىلىق جاعدايلاردىڭ سانى ارتىپ وتىرعانىن اتاپ ءوتتى.
– بيىل كامەلەتكە تولماعاندار اراسىنداعى قىلمىس 4,2 پايىزعا ارتقان. اسىرەسە، ەسىرتكى، سينتەتيكالىق ەسىرتكى ساۋداسىندا الەۋمەتتىك جەلىلەر ارقىلى جاستاردىڭ كوپتەپ الدانۋ فاكتىلەرى كوپ. ولارعا 7-10 جىلدان ارتىق باس بوستاندىعىنان ايىرۋ جازاسىن الادى. بۇگىن وسى بويىنشا ارنايى دايىندالعان بەينەروليكتى جاستاردىڭ نازارىنا ۇسىنامىز. سونىمەن قاتار، قالا پروكۋرورىنىڭ شەشىمىمەن 71 ءموبيلدى توپ قۇرىلدى. ولار 469 رەيدتىك شارالار ۇيىمداستىرىپ، ناتيجەسىندە 4800 كامەلەتكە تولماعانداردىڭ تۇنگى ۋاقىتتا بەي-بەرەكەت ءجۇرۋى، 5000 ۇستىندە اكىمشىلىك جاۋاپكەرشىلىككە تارتىلعان. قازىرگى تاڭدا بۇل باعىتتاعى جۇمىستارعا بارلىق مەملەكەتتىك ۇيىمداردى ۇيلەستىرىپ، قۇقىق بۇزۋشىلىقتىڭ الدىن الۋ بويىنشا جۇمىستار اتقارىلۋدا، – دەيدى قايسار قالداباەۆ.
كەزدەسۋگە ارنايى شاقىرتىلعان بوكستان قازاقستان رەسپۋبليكاسىنا ەڭبەك سىڭىرگەن سپورت شەبەرى ءبىرجان جاقىپۇلى جاستاردى جات قىلىقتاردان ساقتانۋعا شاقىرىپ، سالاۋاتتى ءومىر سالتىن ۇستانۋعا كەڭەس بەردى. ستۋدەنتتەر وزدەرىن قىزىقتىرعان سۇراقتارىن قويىپ، قۇقىقتىق ساۋاتتىلىقتى ارتتىرۋعا باعىتتالعان ۇسىنىستارىمەن ءبولىسىپ، سالا وكىلدەرىنە ءوز ساۋالدارىن جولدادى.
وسىنداي ءىس-شارالار جاستاردىڭ قۇقىقتىق ساۋاتتىلىعىن ارتتىرىپ، قوعامداعى قۇقىق بۇزۋشىلىقتىڭ الدىن الۋعا سەپتىگىن تيگىزەتىنى كامىل.
