Búgin «Quqyq buzýshylyqtyń aldyn alý máselesi» taqyrybynda M.Áýezov atyndaǵy OQÝ-da arnaıy kezdesý uıymdastyryldy. Is-sharaǵa quqyq qorǵaý organdarynyń ókilderi, oqý ornynyń oqytýshylary men stýdentteri qatysty. Jastarmen kezdesý Qazaqstan Respýblıkasynyń Bas prokýratýrasynyń tapsyrmasy aıasynda kópshiliktiń quqyqtyq saýattylyǵyn arttyrý, quqyqtyq sanasyn joǵarylatý maqsatynda qalalyq prokýratýra, qalalyq ishki saıasat jáne jastar isteri jónindegi basqarmasy, qalalyq Jastar ortalyǵynyń birlesýimen ótti.
Kezdesý barysynda quqyqtyq mádenıetti qalyptastyrý, zań buzýshylyqtarǵa jol bermeý jáne jastar arasyndaǵy quqyq buzýshylyq deńgeıin tómendetý máseleleri talqylandy. Spıkerler stýdentterge quqyqtyq jaýapkershilik týraly tolyq aqparat berip, quqyq buzýshylyqtyń saldary týraly naqty mysaldar keltirdi.
Ýnıversıtettiń Akademııalyq máseleler jónindegi prorektory Qurmanǵalı Saryqulov júzdesýdiń mańyzdylyǵyna toqtaldy. Sondaı-aq, QR prokýratýrasynyń qurmetti qyzmetkeri, aǵa ádilet keńesshisi Ábdiraman Aqqulov «Qoǵamdaǵy quqyq buzýshylyqtyń aldyn alý máseleleri» baıandamasynda jas býyndy elikteýden saqtanýǵa shaqyryp, sot isindegi jaǵdaılardan mysaldar keltirdi.
Shymkent qalasy prokýrorynyń aǵa kómekshisi Qaısar Qaldabaev óz sózinde jastar arasynda quqyq buzýshylyq jaǵdaılardyń sany artyp otyrǵanyn atap ótti.
– Bıyl kámeletke tolmaǵandar arasyndaǵy qylmys 4,2 paıyzǵa artqan. Ásirese, esirtki, sıntetıkalyq esirtki saýdasynda áleýmettik jeliler arqyly jastardyń kóptep aldaný faktileri kóp. Olarǵa 7-10 jyldan artyq bas bostandyǵynan aıyrý jazasyn alady. Búgin osy boıynsha arnaıy daıyndalǵan beınerolıkti jastardyń nazaryna usynamyz. Sonymen qatar, qala prokýrorynyń sheshimimen 71 mobıldi top quryldy. Olar 469 reıdtik sharalar uıymdastyryp, nátıjesinde 4800 kámeletke tolmaǵandardyń túngi ýaqytta beı-bereket júrýi, 5000 ústinde ákimshilik jaýapkershilikke tartylǵan. Qazirgi tańda bul baǵyttaǵy jumystarǵa barlyq memlekettik uıymdardy úılestirip, quqyq buzýshylyqtyń aldyn alý boıynsha jumystar atqarylýda, – deıdi Qaısar Qaldabaev.
Kezdesýge arnaıy shaqyrtylǵan bokstan Qazaqstan Respýblıkasyna eńbek sińirgen sport sheberi Birjan Jaqypuly jastardy jat qylyqtardan saqtanýǵa shaqyryp, salaýatty ómir saltyn ustanýǵa keńes berdi. Stýdentter ózderin qyzyqtyrǵan suraqtaryn qoıyp, quqyqtyq saýattylyqty arttyrýǵa baǵyttalǵan usynystarymen bólisip, sala ókilderine óz saýaldaryn joldady.
Osyndaı is-sharalar jastardyń quqyqtyq saýattylyǵyn arttyryp, qoǵamdaǵy quqyq buzýshylyqtyń aldyn alýǵa septigin tıgizetini kámil.
