قما ەرىكتىلەر قوزعالىسىنىڭ بەلسەندىسى پەريزات قايراتقا قاتىستى تاعى ءبىر دەرەكتى جاريالاعانىن مالىمدەدى، دەپ حابارلايدى "ادىرنا" ۇلتتىق پورتالى.
قما حابارلاماسىندا:
«2023 جىلدىڭ قاراشا ايىندا پەريزات قايرات پالەستينا تۇرعىندارىنا گۋمانيتارلىق كومەك كورسەتۋ ءۇشىن قاراجات جيناۋدى ۇيىمداستىردى.
2023 جىلعى جەلتوقساندا وسى اقشا ەسەبىنەن پەريزات قايرات «Sensata Plaza» ەليتالىق كەشەنىنەن 49 ملن تەڭگەگە ءۇش بولمەلى پاتەر جانە 30 ملن تەڭگەگە «Mercedes-Benz EQE 500 4 Matic» جاڭا اۆتوكولىگىن ساتىپ الدى.
سونىمەن قاتار، قاراجاتتىڭ ءبىر بولىگى ءباا-دە «Rolex»، «Prada» جانە «Fendi» برەندتىك بۋتيكتەرىنەن زەرگەرلىك بۇيىمداردى، ساعاتتار مەن كيىمدەردى ساتىپ الۋعا جۇمسالدى»، — دەلىنگەن اگەنتتىكتىڭ مالىمدەمەسىندە.
بۇل ەپيزود بويىنشا قما پەريزات قايراتتىڭ 200 ملن تەڭگەدەن اسا قاراجاتتى جىمقىردى دەگەن كۇدىككە ىلىنگەنىن حابارلادى. تەرگەۋ جالعاسۋدا.
«ەگەر ءسىز پەريزات قايراتتىڭ الاياقتىق ارەكەتتەرىنىڭ قۇربانى بولساڭىز، استانا قالاسى بەيبىتشىلىك كوشەسى، 10 مەكەن-جايى بويىنشا نەمەسە +7 (7172) 70-84-78 تەلەفون ءنومىرى بويىنشا قارجىلىق مونيتورينگ اگەنتتىگىنە حابارلاسۋىڭىزدى سۇرايمىز»، — دەپ جازدى ۆەدومستۆودان.
ايتا كەتەيىك، قازاقستاننىڭ پارا ۇستەل تەننيسى فەدەراتسياسى پەريزات قايراتتىڭ ۇستالۋىنا جانە وعان قاتىستى تەرگەۋدىڭ باستالۋىنا بايلانىستى ۇيىم پرەزيدەنتى قىزمەتىنەن بوساتىلعان بولاتىن.
