جاڭاوزەندەگى "وزەنمۇنايگازعا" قاراستى "بۇرعىلاۋ جۇمىستارى باسقارماسى" كومپانياسىنىڭ جۇمىسشىلارى ءۇشىنشى كۇن قاتارىنان ەرەۋىلگە شىقتى، دەپ حابارلايدى "ادىرنا" ۇلتتىق پورتالى ۇلىسمەدياعا سىلتەپ.
تىلشىمەن سويلەسكەن قىزمەتكەرلەردىڭ ءبىرى “تالابىمىز ورىندالمايىنشا، جۇمىستى جالعاستىرمايمىز” دەگەن.
"بۇرعىلاۋ جۇمىستارى باسقارماسى" كومپانياسىندا وپەراتور بولىپ ىستەيتىن مۇراتباي جۇماعاليەۆ بۇل جولعى ەرەۋىلدەگى تالاپتار جاڭا تالاپتار ەمەس، وسىعان دەيىن قويىلعان، باسشىلىق تاراپىنان شەشۋ ۋادە ەتىلگەن تالاپتار ەكەنىن ايتادى.
مۇراتباي ەسىمدى جۇمىسشىنىڭ سوزىنشە، بۇعان دەيىن قازمۇنايگازدىڭ باسشىلارى قاراشاعا دەيىن تالاپتارىن بىرجاقتى ەتەتىنىن مالىمدەگەن.
“ولاردان حابار بولماعان سوڭ، وسىلاي جۇمىستى توقتاتىپ، ەرەۋىلدەتىپ جاتىرمىز”، - دەدى مۇراتباي.
كومپانيا جۇمىسشىسىنىڭ ايتۋىنشا، كاسىپورىندا 1250-دەي ادام جۇمىس ىستەيدى. بۇگىندە ءبارى جۇمىستى توقتاتقان. تالاپ-تىلەكتەر ورىندالماي، قىزمەتكەرلەر جۇمىسقا كىرىسپەيتىنىن ايتقان.
ولارعا الدىمەن “وزەنمۇنايگاز” اق-نىڭ باس ديرەكتورى جانبولات سايماعانبەتوۆ كەلىپ، قويىلىپ وتىرعان تالاپتاردى ورىنداي المايتىنىن ايتقان. ياعني، ونى شەشۋ “جوعارى جاق” – “قازمۇنايگاز”-دىڭ ەنشىسىندە ەكەنىن ايتقان. جۇمىسشىلار “شەشە الماساڭ، جوعارى جاقتى شاقىر وندا” دەلىنگەن.
كومپانيا قىزمەتكەرى مۇراتباي جۇماعاليەۆ “ەرەۋىلدەتەنىمىزدى الدىن الا ەسكەرتكەنبىز” دەيدى.
“بىزدە بۇرىن 7 تالاپ بولعان، ەكەۋىن ورىنداۋ قيىن دەگەن سوڭ 5-كە تۇسىردىك. قازمۇنايگازدان الدىمىزعا كەلسىن، سويلەسەمىز، كەلىسەمىز. اسپانداعى ايدى سۇراپ جاتسىڭدار، مىناۋ مۇمكىن ەمەس دەسە حالىق تا تۇسىنەدى عوي. شابارماندارىن، پروكۋراتۋرانى جىبەرمەي بىزگە وزدەرى كەلسىن. جاعدايعا قاراي سويلەسەمىز. كەلمەيىنشە، جۇمىستى جالعاستىرمايمىز، وسىلاي تالاپ ەتىپ تۇرا بەرەمىز”، - دەيدى ول.
«وزەنمۇنايگاز» وكىلدەرى “قازىرگى ۋاقىتتا باسشىلىق كاسىپورىن جۇمىسشىلارىمەن كەلىسسوز جۇرگىزىپ جاتىر” دەپ جاۋاپ بەردى.
“ولار قويعان ءار تالاپ مۇقيات قاراستىرىلادى. بارلىق ماسەلە زاڭ اياسىندا، اتاپ ايتقاندا قر ەڭبەك كودەكسىنىڭ شەڭبەرىندە شەشىلۋگە ءتيىس” دەلىنگەن كومپانيا جاۋابىندا.
"بۇرعىلاۋ جۇمىستارى باسقارماسى" كومناياسىنىڭ جۇمىسشىلارى باسشىلىققا بەس ءتۇرلى تالاپ قويعانى تۋرالى ايتىلعان بولاتىن.
