جاڭاوزەندە جەتى ايلىق ءسابي ۇيىندە مەتالل جەلدەتكىشكە قولىن جاراقاتتاپ العان، دەپ حابارلايدى "ادىرنا" ءتىلشىسى.
بالانىڭ ساۋساقتارى قۇرىلعىعا ءتۇسىپ، وعان شۇعىل مەديتسينالىق كومەك كورسەتىلدى.
جاڭاوزەن قالالىق كوپبەيىندى اۋرۋحاناسىنىڭ تراۆماتولوگ-ورتوپەدى نۇرسۇلتان اسقاروۆتىڭ مالىمەتىنشە، نارەستە جەدەل تۇردە تراۆماتولوگيا بولىمىنە جەتكىزىلگەن. دارىگەرلەر تەكسەرۋ بارىسىندا بالانىڭ قولىنداعى سۇق، ورتاڭعى جانە اتى جوق ساۋساقتارىنىڭ ۇشتارى جاراقاتتانعانىن انىقتاعان.
ماماندار جارالارعا العاشقى حيرۋرگيالىق وڭدەۋ جۇرگىزگەن. ءتورتىنشى ساۋساقتىڭ ۇشى تولىق بولماعاندىقتان، دارىگەرلەر ونىڭ جاراقاتتانعان بولىگىن وڭدەپ، تۇيىقتاۋعا ءماجبۇر بولعان. ورتاڭعى ساۋساق قولمەن تەك تەرى ارقىلى بايلانىسىپ تۇرعان. وعان دا حيرۋرگيالىق وڭدەۋ جۇرگىزىلىپ، تىگىس سالىنعان. سۇق ساۋساقتىڭ جاراسى دا وڭدەلىپ، تىگىلگەن.
ءسابي ءارى قاراي ەمدەلىپ، دارىگەرلەردىڭ باقىلاۋىندا بولۋ ءۇشىن تراۆماتولوگيا بولىمىنە جاتقىزىلعان. ستاتسيونارلىق ەمنەن كەيىن تراۆماتولوگتىڭ باقىلاۋىندا بولعان.
دارىگەر اتا-انالارعا بالالاردى قاراۋسىز قالدىرماۋعا جانە ولاردى قاۋىپتى تۇرمىستىق زاتتاردان الىس ۇستاۋعا كەڭەس بەردى.
