قىلمىستىق-اتقارۋ جۇيەسى كوميتەتى سوتتالعان ەكس-مينيستر قۋاندىق بيشىمباەۆتىڭ قاي كولونيادا جازاسىن وتەپ جاتقانىن اتاعان جوق، دەپ حابارلايدى "ادىرنا" ۇلتتىق پورتالى Tengrinews.kz تىلشىسىنە سىلتەپ.
بۇعان دەيىن سوتتالعان ءمينيستردىڭ ادۆوكاتى ەرلان عازىمجانوۆ بيشىمباەۆتىڭ ستەپنوگورسك قالاسىنداعى ماكسيمالدى قاۋىپسىزدىك مەكەمەسىندە وتىرعانىن ايتقان. سول ۋاقىتتا باق-تا قۋاندىق بيشىمباەۆتىڭ ستەپنوگورسك قالاسىنداعى №5 مەكەمەدە جازاسىن وتەپ جاتقانى تۋرالى بەيرەمي اقپارات تارادى. كوميتەت بۇل اقپاراتتى ءىشىنارا راستاعان. الايدا ناقتى كولونيانى اتامادى.
"سۇراۋدا كورسەتىلگەن سوتتالعان ازامات سوت بەلگىلەگەن جازاسىن قىلمىستىق-اتقارۋ جۇيەسىنىڭ ماكسيمالدى قاۋىپسىزدىك مەكەمەسىندە وتەپ جاتىر. جازاسىن وتەۋ ورنى تۋرالى ونىڭ جاقىن تۋىستارى قولدانىستاعى زاڭناماعا (قىلمىستىق-اتقارۋ كودەكسىنىڭ 25-بابىنا) سايكەس حابارلاندىرىلدى", — دەپ جاۋاپ بەردى كوميتەت.
ەستەرىڭىزگە سالا كەتەيىك، قىلمىستىق-اتقارۋ كودەكسىنىڭ 25-بابىنا سايكەس، مەكەمە نەمەسە جازانى ورىندايتىن ورگان سوتتالعان ازاماتتىڭ كەلىپ تۇسكەنىن ونىڭ جۇبايى، تۋىسى نەمەسە زاڭدى وكىلىنە ەكى جۇمىس كۇنى ىشىندە حابارلاۋعا مىندەتتى. كوميتەتتە قۋاندىق بيشىمباەۆتىڭ كولونيادا جۇمىس ىستەمەيتىنىن دە مالىمدەدى.
"مەكەمەدەگى كۇن ءتارتىبى بارلىق تۇتقىندار ءۇشىن بىردەي. جۇمىس ورىندارىنىڭ بولماۋىنا بايلانىستى ول ەڭبەككە ورنالاستىرىلماعان", — دەپ حابارلادى كوميتەت.
ايتا كەتەيىك، ەكس-مينيستر 24 جىلعا سوتتالعان بولاتىن. الايدا قۋاندىق بيشىمباەۆتىڭ ادۆوكاتى سوت ۇكىمىنە شاعىمداناتىنىن ايتتى.
