قۋاندىق بيشىمباەۆقا قاتىستى قىلمىستىق ءىس بويىنشا اشىق سوت وتىرىسى جالعاسۋدا. بۇگىنگى سوت وتىرىسىندا بۇرىنعى ۇلتتىق ەكونوميكا ءمينيسترىنىڭ اناسى العاش رەت ءسوز سويلەدى، دەپ حابارلايدى "ادىرنا" ءتىلشىسى قازاقپاراتقا سىلتەپ.
بيشىمباەۆ ازاماتتىق نەكەدەگى جۇبايى سالتانات نۇكەنوۆانى اسا قاتىگەزدىكپەن ءولتىردى دەپ ايىپتالعان. بۇگىنگى تۇستەن كەيىنگى سوت وتىرىسىنا جابىرلەنۋشى ايتبەك امانگەلدى جانە ونىڭ وكىلدەرىنىڭ ءبىرى قاتىسقان جوق. سەبەبى جابىرلەنۋشى تاراپ مارقۇمنىڭ اتا-اناسى ءوزىن جايسىز سەزىنگەنىن ايتقان. ارتىنشا ولارعا جەدەل جاردەم شاقىرىلعان.
دەگەنمەن سۋديا سوت زالىنان رۇقساتسىز شىعۋعا بولمايتىنىن ايتتى.
«ول كەز كەلگەن ۋاقىتتا كىرىپ-شىعا المايدى. ول ءۇشىن سوتتان رۇقسات سۇراۋ كەرەك. ءتارتىپ بارىنە ورتاق، ۇزىلىسكە دەيىن كۇتسىن»، - دەدى سۋديا ايجان قۇلباەۆا.
سوت بارىسىندا ق.بيشىمباەۆتى قورعاۋشى تاراپ سوتتا ماسكەۋلىك مامانداردىڭ قورىتىندىسىمەن تانىستىردى. قورعاۋشى نازكەن قۇسايىنوۆا رەسەيلىك مامانداردىڭ قورىتىندىسىن وقي وتىرىپ، نۇكەنوۆانىڭ ولىمىنە قاتىستى دەرەكتەرمەن ءبولىستى. ول مارقۇمنىڭ باسىنان قاننىڭ كەتۋى، ولىمنەن 3-4 اپتا بۇرىن پايدا بولعان گەماتوما بولۋى مۇمكىن دەپ مالىمدەيدى.
سونداي-اق، سوت وتىرىسىندا قۋاندىق بيشىمباەۆتىڭ اناسى الميرا نۇرلىبەكوۆا العاش رەت ءسوز سويلەدى.
«ارينە، مەن زاڭگەر ەمەسپىن، بىراق ماسكەۋلىك مامانداردىڭ قورىتىندىسىن قابىلداماساڭىز، ۇلىمنىڭ ءوزىن قورعاۋ جولىندا دالەلدەر كەلتىرۋدە كونستيتۋتسيالىق قۇقىعىن شەكتەۋ دەپ سانايمىن. بۇنى انا رەتىندە شىن جۇرەكتەن ايتىپ وتىرمىن»، - دەدى كۇدىكتىنىڭ اناسى سۋدياعا قاراي وتىرىپ.
ايتا كەتەيىك، سوت وتىرىسى ەرتەڭ جالعاسپاق.
