Qylmystyq-atqarý júıesi komıteti sottalǵan eks-mınıstr Qýandyq Bıshimbaevtyń qaı kolonııada jazasyn ótep jatqanyn ataǵan joq, dep habarlaıdy "Adyrna" ulttyq portaly Tengrinews.kz tilshisine siltep.
Buǵan deıin sottalǵan mınıstrdiń advokaty Erlan Ǵazymjanov Bıshimbaevtyń Stepnogorsk qalasyndaǵy maksımaldy qaýipsizdik mekemesinde otyrǵanyn aıtqan. Sol ýaqytta BAQ-ta Qýandyq Bıshimbaevtyń Stepnogorsk qalasyndaǵy №5 mekemede jazasyn ótep jatqany týraly beıremı aqparat tarady. Komıtet bul aqparatty ishinara rastaǵan. Alaıda naqty kolonııany atamady.
"Suraýda kórsetilgen sottalǵan azamat sot belgilegen jazasyn qylmystyq-atqarý júıesiniń maksımaldy qaýipsizdik mekemesinde ótep jatyr. Jazasyn óteý orny týraly onyń jaqyn týystary qoldanystaǵy zańnamaǵa (Qylmystyq-atqarý kodeksiniń 25-babyna) sáıkes habarlandyryldy", — dep jaýap berdi komıtet.
Esterińizge sala keteıik, Qylmystyq-atqarý kodeksiniń 25-babyna sáıkes, mekeme nemese jazany oryndaıtyn organ sottalǵan azamattyń kelip túskenin onyń jubaıy, týysy nemese zańdy ókiline eki jumys kúni ishinde habarlaýǵa mindetti. Komıtette Qýandyq Bıshimbaevtyń kolonııada jumys istemeıtinin de málimdedi.
"Mekemedegi kún tártibi barlyq tutqyndar úshin birdeı. Jumys oryndarynyń bolmaýyna baılanysty ol eńbekke ornalastyrylmaǵan", — dep habarlady komıtet.
Aıta keteıik, eks-mınıstr 24 jylǵa sottalǵan bolatyn. Alaıda Qýandyq Bıshimbaevtyń advokaty sot úkimine shaǵymdanatynyn aıtty.
