بۇگىن ايماق باسشىسى نۇرلىبەك نالىباەۆ كەشەگى ۇكىمەت وتىرىسىنىڭ كۇن تارتىبىندە قارالعان ماسەلەلەرگە قاتىستى ارنايى جيىن وتكىزىپ، جاۋاپتى سالا باسشىلارى مەن اۋدان اكىمدەرىنە بىرقاتار تاپسىرما بەردى.
الدىمەن وبلىس اكىمى مەملەكەت باسشىسىنىڭ تاپسىرماسىمەن ايماققا ارنايى كەلگەن قر پرەمەر-ءمينيسترى ولجاس ابايۇلى بەكتەنوۆتىڭ جۇمىس ساپارىنىڭ قورىتىندىلارى تۋرالى ايتتى.
«مەملەكەت باسشىسىنىڭ تاپسىرماسىمەن كەشە وبلىسقا ۇكىمەت باسشىسى ولجاس ابايۇلى بەكتەنوۆ ارنايى جۇمىس ساپارمەن كەلىپ، ايماعىمىز ءۇشىن اۋقىمدى، تاريحي ماڭىزدى جوبالاردىڭ ءبىرى «قورقىت اتا اۋەجايىنىڭ» جاڭا تەرمينالىن سالتاناتتى تۇردە اشتى. جەكە ينۆەستور، جەرلەسىمىز «بولات وتەمۇراتوۆ قورىنىڭ» دەمەۋشىلىگىمەن سالىنعان زاماناۋي ۇلگىدەگى جاڭا تەرمينالدا جولاۋشىلارعا بارلىق جاعداي قاراستىرىلعان. جاڭا تەرمينال ساعاتىنا 250 جولاۋشىعا قىزمەت كورسەتۋگە، ساۋدا-لوگيستيكالىق الەۋەتتى دامىتۋعا جانە جاڭا رەيستەر اشۋعا مۇمكىندىك بەرەدى.
بۇدان بولەك، ۇكىمەت باسشىسى قىزىلوردا قالاسى جانە بەسارىق اۋىلىنداعى بىرقاتار جاڭا نىساندارمەن تانىستى. ساپار قورىتىندىسىندا ايماعىمىزدا اتقارىلعان اۋقىمدى جۇمىستارعا وڭ باعاسىن بەردى. بۇل باعا بارشا جەرلەستەرىمىزدىڭ بىرلىگى مەن تاتۋ تىرلىگىنىڭ جەمىسى دەپ بىلەمىن. پرەزيدەنتىمىزدىڭ سىر وڭىرىنە دەگەن ەرەكشە قامقورلىعى جاڭا باستامالارعا جول اشتى.
ۇكىمەتتىك دەلەگاتسيانىڭ وڭىرگە جۇمىس ساپارىن جوعارى دەڭگەيدە ۇيىمداستىرىپ، وتكىزۋگە اتسالىسقان بارشا ارىپتەستەرىمە، زيالى قاۋىمعا، باق وكىلدەرىنە، كاسىپكەرلەر قاۋىمىنا، «قورقىت اتا اۋەجايىنىڭ» ۇجىمىنا، قىزىلوردا قالاسى، سىرداريا اۋدانى اكىمدىكتەرىنە شىنايى ريزاشىلىعىمدى ءبىلدىرىپ، العىسىمدى جەتكىزەمىن»، – دەدى ن.نالىباەۆ.
سونىمەن قاتار، ايماق باسشىسى جىلۋ ماۋسىمىنداعى ءورت قاۋىپسىزدىگى، حالىقتى ءدارى-دارمەكپەن قامتاماسىز ەتۋ ماسەلەلەرىنە توقتالىپ، جاۋاپتى سالا باسشىلارىنا بىرقاتار تاپسىرما بەردى.
«جىلۋ بەرۋ ماۋسىمىندا تۇرعىنداردىڭ قاۋىپسىزدىگىن قامتاماسىز ەتۋ ءۇشىن پروفيلاكتيكالىق ءىس-شارالاردى تياناقتى ۇيىمداستىرىڭىزدار. جەرگىلىكتى بۇقارالىق اقپارات قۇرالدارى ارقىلى تابيعي گازدى قاۋىپسىز پايدالانۋ، ونىڭ ىشىندە ءتۇتىن جولدارى مەن اۋا-جەلدەتكىش كانالدارىن ۋاقىتىلى تازالاۋ جانە جىلۋ ماۋسىمى كەزىندەگى ءورت قاۋىپسىزدىگىنىڭ تالاپتارىن ساقتاۋ باعىتىندا ۇگىت-ناسيحات جۇمىستارىن جۇرگىزىڭىزدەر.
رەسپۋبليكالىق جانە جەرگىلىكتى بيۋدجەت ەسەبىنەن بەرىلەتىن تەگىن ءدارى-دارمەكتىڭ تۇرعىندارعا تولىق جەتكىزىلۋىن قاداعالاپ، توقسان سايىن ەسەبىن جۇرگىزىڭىزدەر. وڭىردەگى ەمدەۋ مەكەمەلەرىندە گوسپيتالدى فارماتسيا بولىمدەرىن اشۋ ماسەلەسىن جان-جاقتى زەردەلەپ، ۇسىنىس بەرىڭىزدەر»، – دەدى ايماق باسشىسى.
